Kaupapa: Environment

Kei te wehiwehi te hau kāinga ki te raweketanga o te mauri o Ngāwhā

Dean Nathan
  • Te Tai Tokerau

Kei te wehiwehi tonu te hau kāinga ki te raweketanga o te mauri o Ngāwhā.  Koinei hoki te ia o ngā kōrero i tēnei rā ki te tono a te kamupene o Top Energy kia whakawhānuitia atu āna mahi hiko ki taua takiwā.  

Kei te wehiwehi tonu te hau kāinga ki te raweketanga o te mauri o Ngāwhā. 

Koinei hoki te ia o ngā kōrero i tēnei rā ki te tono a te kamupene o Top Energy kia whakawhānuitia atu ana mahi hiko ki taua takiwā. 

Kua puta te anipa a ētahi o te hau kāinga o Ngāwhā i te kaupapa a Top Energy kia whakawhānui i tā rātou Whare Ngāwhā hiko.

Hei tā Renata Tane, “Ko tā mātou nei titiro, e patu ana rātou i te mauri o te wāhi nā ngā waimahana ngā waiariki.  Inā mahi pērā e rātou e tūkinotia ana, ko wai te mea ka patua ko o mātou nei taonga.  Ka patu kia mate rawa atu.  Nā, e kore mātou e whakaae ana ki tērā.

Kahore hoki ngā rangatira o Top Energy e pai kia kōrero mō tēnei take kia oti rā anō te wāhanga tuku kōrero ki tā rātou tono.

Ki tā Percy Tipene, “I tēnei wā e whakahē ana ka tika i te mea kahore anō tātou I mōhio noa ki te hohonutanga o te raweketanga o ēnei ngāwhā.”

I kīa ai ko Te Ngāwhā te kanohi o te taonga engari ko tōna whatumanawa ko tōna mana hauora nō raro, arā ko te taniwha a Tākauere i ahu mai i Hawaiki.

E ai ki a Tane, “Kia tiaki te taonga nei a Takauere koinā te pupuri i te mahana, i te mauri o te whenua o Papatūānuku. Hēoi anō, kia awhi mai i te whānau o Ngāpuhi nui tonu o mātou nei tikanga te mauri kia pupuri tonu, kia mau tonu mō ake tonu atu.”