Kei te tū tētahi wānanga tā moko ki te kura o Toihoukura

Aroha Treacher
  • Te Tai Rāwhiti

Hei ngā rā e toru kei te haere mai nei, e muia ana te kura mahi toi Māori tawhito rawa ki Aotearoa, ara ko Toihoukura ki te Tairāwhiti e ngā tohunga Tā Moko Māori.

Nō ngā tōpito o te motu rātou, ā, nā ō rātou ngākaunui ki te kaupapa, kei te ū rātou ki ngā mahi tika kia haere pai ai tēnei tikanga tuku iho a ngā tūpuna.

Ki tētahi tauira o Toihoukura o mua a Cy McLeod, kua mahi ia hei tohunga Tā Moko i ngā tau e waru kua horī, otira, mā ngā wānanga pēnei e puawai tonu ōna pūkenga.

Nā te whakaaetanga o tōna māmā, e tāea ai a Keenan Kaiwai e tekau mā whitu ōna tau, te whiwhi i tōna moko tuatahi, he moko motuhake hei tohu ō tōna whānau.

E ai ki te rangahau o ngā tāngata e toru kei raro i te toru tekau ngā tau te pakeke, kotahi o rātou ka whiwhi moko, nā te tipu matomato o te maumoko i ngā tau, he mea hiranga ki ngā tohunga moko kia ū ki ngā tikanga hauora i te aō moko.

Hei tā Raniera McGrath, “He nui nei ngā tikanga kāore i mōhiotia nei e wērā e mahi ana i te tā moko nei, tērā kia whakaturengia tētahi mea kia tino pai ai te tā i te kiri o te tangata ko te mutunga iho o te rā ko te hauora o tērā tangata whiwhi ana i te moko i te tattoo rāinei te mea nui.”

Ahakoa horekau ngā ture a-kawanatanga kia whakarite i ngā mahi moko ki Aotearoa nei, he kawa anō kē e whakaritea ana, he mea nui tonu ki ēnei tohunga Tā Moko.