Kaupapa: Transport

Kei te tohe a Ngāti Whātua Ōrākei i te huarahi rāwhiti-uru

Te Kuru o te Marama Dewes
  • Tāmaki Makaurau

Kua whakaaetia te rautaki rori hou rāwhiti-uru, he kaupapa no te rōpū Waka Kotahi kia whakahono i ngā rori matua mai i Onehunga ki Maungarei. Ko tā te rōpū Waka Kotahi ka tere ake, ka ngāwari hoki te haere i te huarahi, ēngari kei te whakahē a Ngāti Whātua Ōrākei i tēnei whakatau.

E whakapaetia nei e Waka Kotahi kei eke pea te nama hanga ki te kotahi ira waru rima piriona tāra.

Hei tā Ngārimu Blair o Ngāti Whātua Ōrākei, “Kua whakaae te EPA, Environmental Protection Authority, ki te tuku ngā consents hei hanga tēnei ara.”

I whakaaetia te mahere nei e tētahi Kooti Poari, he huarahi ka hono i a Maungarei ki Onehunga. Heoi, kāre a Ngāti Whātua Ōrākei e whakaae ana, nā reira kua kawea te take nei ki rō kōti.

Ko tā Blair, “Kei te whārikihia tēnei ara matua, te mānuka, Te Mānukanuka a Hoturoa (Manukau), me ngā kāenga o ētahi o ngā manu ngā taonga o ngā iwi o tēnei rohe o Tāmaki Makaurau.”

I whakapā atu a Te Kāea ki te rōpū Waka Kotahi, arā ko tā rātau, karekau he herenga o ngā whakaaetanga nei engari he āheinga, ā, kei te tiro rātau ki ngā kōwhiringa e heke ai te nama, e pai ake te whakautu.

Hei tā Blair he pai ake mēnā ka tuku i ngā pūtea ki ngā taonga tūmatanui arā ngā pahi me ngā tereina.

“He painga tera mō ngā tāngata e kore e taea ki te eke motoka pea, ka taea ēnei momo ki te kawe i te tini o ngā tāngata.”

 He tekau mā rima tau e mana ai ngā whakaaetanga hei hanga i te ara nei, ahakoa ko wai te kāwanatanga.