Kei te tautoko a Uawa ki ngā whānau kua pākia e te waipuke

Aroha Treacher
  • Te Tai Rāwhiti

Tekau ngā rā mai i te waipuke nui i te wīkene o te Kuini, koia tērā i turaki i te hapori o Uawa, i tēnei wā tonu kei te whai oranga tonu te whānau Mitchell i a rātou e whakatika tonu ana i tō rātou kainga kua nōhia e rātou mō ngā tau e rima.

Ko Taylah Mitchell me te tokoono o tōna whānau, rātou ko ōna mātua tipuna, e ngana ana ki te whakarauora rawa.

"He kākāhu noa iho ā mātou," tā Taylah.

Kua nuku atu rātou i tēnei kainga e rima ruma te rahi ki tētahi whare rēti e toru ngā ruma te rahi mō tēnei wā.

"I ngaro katoa o mātou taputapu, ngā pikitia, ngā whakaahua, kei te hari mātou nā te kore tētahi o mātou i mate," tā Shaun Mitchell.

E tautoko ana te hapori o Uawa i ngā whānau tekau mā rima pea e noho taumaha tonu ana i tēnei wā.

"Huhua ana ngā kai e takoha ana ki te hapori, katoa ngā tāngata e tuku āwhina tētahi ki tētahi," tā Kelly Blackman, kaiwhakahaere āwhina o Uawa.

"Mei kore ake tō rātou āwhina mai ki a mātou ka mate nui tonu mātou, ahakoa he kōtahi wiki kua hipa ake ka tautoko tonu mai rātou," tā Shaun.