Kei te taki atu rā a Native Woodcraft i te ao katoa

Aroha Treacher
  • Te Tai Tokerau

E whakahaerehia ana te pakihi Native Woodcraft e Jared Mulinder, he pakihi ā-whānau kei te kainga pakupaku nei o Tāmaki Nui a Rua. E whaowhao ana ia i ngā whakairo Māori mā te hunga tāpoi, me tōna mōhio tonu ra, e hiahiatia nuitia ana ōna tāonga e ngā tini rāwaho, engari rā, nā te nui o te mahi tē tāea e ia te mahi i ngā mahi katoa.

E ngākaunui ana a Jared Mulinder ki tōna Te Atiawatanga, kōia ko te māuri ka whakatōhia e ia ki āna tāonga Māori nei te hanga.

Hei ko taana “kua roa nei au e whai wāhi atu ana ki tēnei momo mahi, nō taku wehenga pea i te kura tuarua. Nā, kua tekau mā ono tau ahau i kōnei e mahi ana”

E kaha hoko ana te tūruhi i āna taonga, tōna waru tekau ōrau nei ka hokona atu ki tāwāhi. He kotahi mano ngā taonga ka puta ake i tāna wheketere ia marama.

E ai ki a Jared “Ko te miharo nui ko te kite atu rā i te otinga ake o ngā mahi kua oti i a koe, kei reira te oranga mōku”

Kua tau atu tētahi o āna taonga ki ngā ringa o tetahi whēao o Saudi, otirā, ko te United Nations anō tetahi kua tono mō tetahi o āna waka.

Ko te pūkenga o Jared - nānā tonu, ā, e noho whakaiti ana ia i te rāngiwhāwhā o te rongonui o tāna wheketere pakupaku.