Kei te pīrangi te Mana Waka o Tāmaki ki te tapahi pōhutukawa mō te whakaroa huarahi te take

updated Te Kāea
  • Tāmaki Makaurau

Tērā ngā wero kua ara ake mō ngā mahi whakatikatika rori ki te huarahi o Great North ki Tāmaki. E ono ngā rākau pōhutukawa kei te ārai i ngā whakatikatika nei, ā, tērā tētahi wahine e ngana ana ki te whakaahuru i a rātou.

Ehara ēnei rākau, waru tekau tau te pakeke, i te pōhutukawa noa iho ki a Roimata Macgregor, engari kē he waihotanga nō tana whānau.

E ai ki a Macgregor, “He taonga ēnei, ā ki taku whakapae, nā taku koroua i whakatō i ēnei rākau i te wā o te pēhanga.”

Kua tākiri ake te parahanga o te huarahi mō te kuititanga rori matua o te tekau mā ono me te rua tekau ki Waterview, ko te whāinga ia he whakamāmā i te pokeatanga o ngā rori.

Kāore te Mana Waka o Tāmaki i wātea ki te kōrero a kāmera mai i tēnei rā, heoi i whakaputa rātou i tēnei pānui e mea ana " Kāore te Mana Waka o Tāmaki e whakaae ki te turaki i ngā rākau Pohutukawa e ono ki te rori o Great North pēna rānei kāore he huarahi kē atu, ā, koira te whakatau a ngā tohunga hanga.”

E ai ki te Mana Waka o Tāmaki, mā te hanga huarahi eke pahikara me te whakapiki i te nama o ngā pahi, ka heke te mātatoru o ngā waka ki ngā rori.

E ai ki a MacGregor, “Tokomaha tonu i pātai mai, kei te aha koutou? Kāore mātou i mōhio. Ki taku whakaaro he mahi karo noiho tēnei, kia kaua te marea e mōhio. Koinei pea te huarahi iti te pūtea mo te Mana Waka o Tāmaki.”

Tata ki te rua mano ngā waitohu kua kohia e Roimata me tana Rōpū Tiaki Pōhutukawa mō tā rātou petihana ā-ipurangi, ā, e manako ana rātou ka haere tonu ngā mahi.