Kaupapa: Australia

Kei te piki ake ngā āwangawanga mo ngā hapori Iwi Moemoea o Ahitereiria

Heeni Brown
  • Ahitereiria

Kei te māharahara ngā mātanga Māori o te ao whakatū kainga, ao hauora hoki ki te aukatinga o ētahi hapori iwi taketake kotahi rau neke atu i Ahitereiria ki te Uru.

E ai ki a Rau Hosking, mātanga whakatū kāinga tawhito, kāinga hou hoki me kaha te wetewete i tā te kāwana o Ahitereiria aronui ki te ao-ōhanga me te whakarere i ngā tikanga kua whā tekau mano tau e here nei te tangata ki te whenua.

Ko te pakanga mō Kennedy Hill tētahi o ngā pakanga maha e haere ake ana i tenei wa i Ahitereiria ki te Uru.

Ko tā Roy Wiggans he kaumātua no te Iwi Moemoeā no te hapori o Kennedy Hill kua hōhā katoa ia ki ngā whawhai pēnei, ko rātou ngā rangatira o aua whenua, ehara ko te kāwanatanga.

Tā te whānau Wiggan koinei ngā mahuetanga iho o tētahi pā-kainga kaha te ora i ngā tau ki muri.

Ki Aotearoa nei, e mea ana a Rau Hosking tētahi kua roa nei e hanga whare kore hiko ana, mā te whakakotahi i ngā tikanga ō mua mō te noho ki ngā tikanga o naianei, ko te noho tuawhenua tonu o ngā hapori i Ahitereiria, ka tāea.

Kua roa kē ngā uri o Leanora e rongo ana i te wairua pana me ngā mahi aukati hapori.

E hia kē nei ngā wā a Kado Muir me tōnā iwi e hūnukuhia ana kia wātea ai te koraha nei mō te keri koura.

Tā Tākuta David Jansen, mātanga hauora Māori ki te hūnuku anō ngā uri, e kore e kore ka raru ano.

Ko tāna, “Ka raru rātou mō te whai i ngā ratonga hauora ka pēhea rātou, e rua pea ngā kōrero, ka hāere rātou ki ngā tāone nui ka noho rātou ki reira ka noho ko rātou anake i reira, ā, ka raru tērā."

Hei te Pipiri ka mutu te tohatoha pūtea a te kāwana ki ngā ratonga kei ngā hapori iwi whenua moemoea i te Uru o Ahitereiria. Taihoa ka kitea i te hua o tēnā.