Kaupapa: Politics

Kei te mū ngā waha o ngā mema pāremata Māori o te Rōpū Reipa i ngā whakapae taitōkai

Mānia Clarke
  • Waikato/Te Waiariki
  • Te Whanganui-ā-Tara

Kei te mū ngā waha o ngā mema pāremata Māori o te Rōpū Reipa i ngā whakapae taitōkai i te huinga rangatahi i Waihi i tērā marama. He take i tae tuatahi atu ki ngā taringa o te Pirimia o Jacinda Ardern inapō.

Ahakoa koinei te kaupapa kei runga i ngā ngutu o te marea, kāore i kitea e mātou he tangata nō te ope o te kāwanatanga ki te kōrero mēnā āe rānei kāo rānei i tika ngā mahi a Te Rōpū Reipa mō ngā whakapae taitōkai a ngā taiohi tokowhā, nā tētehi tāne e rua tekau tau tōna pakeke rātou i whāwhā poka noa.

E ai ki te hekereteri o Reipa, e ai ki a Andrew Kirton kua aukatingia tāua tāne i ngā kaupapa katoa a te Pāti.

Ka mutu i toro hoki mātou ki ngā ratonga atawhai mārurenga, whērā i te Kaikomihana o Ngā Tamariki ki te kōrero, engari auare ake.  Tokomaha o rātou e whenei ana i te mea kei te arohaehaengia tonutia tēnei take ināianei.

Engari, hei tā te Kaiārahi Tuarua o Te Rōpū Nāhinara a Paula Bennett ki a Te Kāea, he maha ngā pātai hei whakautu mā Reipa. Ahakoa kāore anō mātou i te tino whakamārama he aha te aha, ko te whakapono me whakamōhio kē ngā mātua me te tari pirihimana kia tōtika ai te wherawhera i te kaupapa.

Otia, i taua huinga rangatahi te mema pāremata o Te Waiariki a Tamati Coffey. I mea mai ia ki Te Kāea. Nō te ata o te Rātapu ia i tae atu ai, ka kauwhau mō ngā meneti e whā tekau e pā ana ki te ao tōrangapu Māori, kātahi ka wehe i te tekau karaka. Koirā noaiho.

Nō tērā tau i werohia Te Rōpū Reipa me tō rātou kaupapa kimi kaitaunaki mai i tāwāhi, nō rātou e kimi tangata ana hei āwhina i tā rātou kaupapa kimi pōti mō te Kōwhiringa Pōti. Nā, i puta ngā amuamu a ngētehi tauira mō te āhua o Awataha marae, tō rātou wāhi noho.