Kaupapa: Waitangi

Kei te kōrerotia tonutia te hiahia ki tētahi haki hōu me ngā kōrero whakaparahako a te Pirimia mō Ngāpuhi

  • Te Tai Tokerau

E ai ki te mema pāremata mō Te Tai Tokerau me matua whakapāha te Pirimia ki a Ngāpuhi inā tae atu ia ki Waitangi ā tērā wiki. 

Ko te take, hei tā Kelvin Davis, ko ngā kōrero whakaparahako a John Key mō te pūrongo a te Ropū Whakamana i te Tiriti o Waitangi e mea ana kahore a Ngāi Māori i tuku i tōna rangatiratanga.

I te Pirimia e whakatūwhera kaupapa whare ana, e wero ana te mema mō Te Tai Tokerau, inā tae atu a John Key ki tōna whare me whakapāha ka tika.

Hei tā Davis, “Kua puta te whakahau e tautokongia ana te Taraipiunara i a mātou o Ngāpuhi engari te Pirimia e aro kore ana, me whakapāha mai ki a mātou o Ngāpuhi mō tōna hara."

Heoi, e ai ki te Pirimia tēnā wawata tēnā.

I te whakawātanga o ngā kokoraho o Te Paparahi o Te Raki, i whakatauria e Te Rōpū Whakamana karekau a Ngāi Māori i tuku i tōna rangatiratanga.

Heoi, i whakaparahakotia tērā e te Pirimia.  Āpiti atu, hei tana i nohio rongomautia te whenua nei o Aotearoa.

E ai ki a Kingi Taurua, “Mehemea kāhore e mau ki ngā whakaritenga o te Taraipiunara pangahia atu te Taraipiunara ki roto i te moana, he moumou noa iho te Taraipiunara mehemea kāhore e whakaaetia ana kahore e tautokotia ana e tēnei Kāwanatanga.”

Kāti e mōhiotia ana ko Waitangi tērā ka reia e te haki, nā whai anō te wero ka whakatākotoria e Kingi Taurua ki a John Key mō tana kaupapa whai haki hōu.

Hei tā Taurua, “E mea ana ahau ki a John Key, āta titiro, āta rangahau tēnei kaupapa, engari ko te rangahau e tika ana me hoki mai ki Waitangi ara ki reira kōrero ai tenei take i te take koia tērā ko te wāhi i whakaritea tēnei haki 1835 e tika ana koia tērā te haki mō Aotearoa.”

I tērā tau whakakahore te Pirimia i te whakaaro me matua whai wāhi tētahi āhuatanga Māori ki te haki.  Kei te ū tonu ia ki tēnā.

E ai ki a Davis, “Mēnā horekau he āhua Māori, he tohu Māori ki runga i taua haki ehara i te haki mō Aotearoa whānui, he haki mō tētahi wāhanga noiho o tō tātou hapori.”

Kāti ko Marama Fox tētahi mema o te kōmiti whare pāremata mō tēnei kaupapa.

Tūturu he wiki nui te haere ake nei ki te kāinga o Te Tiriti.