Kaupapa: Te Reo Māori

Kei te kaha tautoko te Minita Whakawhanake Māori i te kerēme a Dover Samuels

Heta Gardiner
  • Te Tai Tokerau

Kei te kaha tautoko te Minita Whakawhanake Māori i te kerēme a Dover Samuels ki te Rōpū Whakamana i te Tiriti mō tāna patunga me ā tūkinotanga i te kura mō te kōrero Māori.  Ko tā Te Ururoa Flavell, me whakapāhā ka tika.  Engari kei te āhua tōtara wāhi rua ētahi atu, ki taua whakatau.

Ko ngā hītori kei ngā papatuhi o ngā kura.  Ēngari, e ai ki ētahi, kāore e ora i tērā noa.

E ai ki a Te Ururoa Flavell, “I rongo ake i te tangi o tana ngākau, mō ngā āhuatanga i pā ki a ia, i a ia e tamariki ana.  Ko te reo Māori tērā kei te pūtake o ana tangi.  Kei te tautoko au i tana wero ki te kāwanatanga, ki te tuku i tētahi kupu whakapāhā.”

Kua kawe a Dover Samuels i tētahi kerēme ki te Rōpū Whakamana i te Tiriti, mō ngā mahi patu i a ia, mō te kōrero Māori i te kura.

Ko Te Ururoa Flavell tētahi o te kāwana ināianei, ēngari kei te rongo ia i aua mamae.

Ki tā Flavell, “Kei te mōteatea tonu te ngākau, i mahia mai ai e ētahi i ngā rā o mua, ki ētahi o ngā tamariki mokupuna, ēhara i te mea ki a ia anake, engari ki tētahi whakatipuranga, i tupu ake i tērā wā.”

Kua mārama te karanga aa te minita, engari, kaore te katoa i te whakae.

Ko Kotuku Tibble tētahi kaiako Māori, ki te Kura Kaupapa Māori o Ngā Mokopuna.  Ko ēnei hītori tana paraoa me te pata.

Kāore ia i te tino kite i te hua, o te whiu noa i te kupu.

Hei tā Tibble, “He māmā te kōrero, me whakapāhā te kāwanatanga, ēngari, he aha te hua o tērā?”

Tuia ki tērā, ko te whakawhiu aa Tibble, kua ea kē tēnei take.        

E ai ki a Tibble, “Ko ahau e pātai ana, he aha ai, e tuaruatia ana ēnei kōrero?  I pōhēhē au, kua makē kē tēnei hoiho, te reo.”

Ko te whakatakoto karahipi mō ngā uri o te hunga i patua, tētahi o ngā tono, a Samuels.