Kaupapa: Education

Kei te kaha āwangawanga ngā tumuaki o te Tai Tokerau ki ngā tamariki tauā i ngā kura tuatahi

Dean Nathan
  • Te Tai Tokerau

Kua oti i te rōpū tumuaki o te Tai Tokerau he rangahau e whakaatu ana i ngā āwangawanga ki ngā tamariki tauā i ngā kura tuatahi o te rohe. 

He rangahau tēnei i whakaputa ai nā te hōha o ngā tumuaki i te kaharoa o o rātou aue mō tēnei āhuatanga e taka ana ki runga taringa turi. 

E kite ana ngā tumuaki kura o Te Taitokerau i te kakenga o ngā whanonga hē ki roto i ngā tamariki whai mate ā-tauwhāiti.

Hei tā Robert Clarke, “E whakaaro kino ana, e mahi kino ana, e patupatu e paopao e kangakanga, arā kua puta mai ēnei rangahau me āta whakaaro te tahuhu inaianei me pēhea te tīni.”

Kua hōha noa atu te rōpū tumuaki o te Tai Tokerau i te kaha roa e uta ana ki runga i ngā kura ko ngā hē o ngā tamariki nō ngā whānau kua roa e ngaua ana e te kore rawa.

E kotahi rau mā whā ngā tumuaki nō taua takiwā i whakautu i ngā pātai o tētahi rangahau e pā ana ki te mātauranga o ngā tamariki whai mate ā-tauwhāiti me ngā āwangawanga mō ngā whanonga hē. 

Neke atu i te haurua o rātou i kī atu, kahore e nui ngā rauemi me ngā āwhinatanga.

E tekau mā whā paiheneti ēnei tumuaki e mea ana, kua eke kē ngā mahi tūkino i ngā kaiako ki taumata mōrearea.

Ki tā Clarke, “Ko te mea tuatahi ko te iti o te pūtea.  Te koretaketanga hoki o ngā rauemi kei te whakaratongia e Te Tahuhu ki ngā kura o Te Taitokerau nei kia whangaihia ngā tamariki taua o ngā kura.”