Kei te hokona atu e Hekenukumai Puhipi tētahi waka hei kohi pūtea mo tētahi whare whakaako

Dean Nathan
  • Te Tai Tokerau

He waka rerekē ake i ngā waka katoa kua hangaia mai e te tohunga tarai waka a Hekenukumai Puhipi, kei te tukua e ia ki te hama o te hoko.

E pēnei ana ia hei utu i te whakaotinga o tōna Whare Wānanga Tarai Waka Tirotiro Whetu kei te whakatūria ki tōna kāinga i Taipā.

He waka tēnei i hanga i runga i ngā tohutohu o ngā mātua, ara kia ara mua kia ara muri.

Hei tā, Hekenukumai Puhipi, “Arā ake āmua me muri kei runga hoki o te wai horekau e pā ana ki te wai.  Kā mutu, e tika ana kia ngāwari mō te huri i te mea he poto noaiho ana ne ngā wāhi i roto i te wai me te horo, me te horo oh well pera ano hoki.  E mea ana te kōrero a te pakeha ‘less drag less drag' e tika ana hoki.

He hokotanga tēnei kia whai pūtea hei whakaoti i te hanganga o tēnei Whare Wānanga mō ngā mahi tarai waka me te tirotiro whetu ma ngā whetu o te pō e ārahi ngā waka i te moananui.

Hei tā Hekenukumai, “Horekau ano i oti noa e hoa kua oti rāwaho me kii engari ko ngā whare paku me te kihini horekau e tino nui atu.  Engari i te wa nei e tu ana inaianei i te mea kua pau a matou moni.”

Mo koutou ngā iwi e hiahia ana ki te hoko i tēnei waka he koni atu i te kotahi rau mano tāra te utu i te kaha nui o te utu ki te tiki atu i ngā rakau kauri mai i te wāo me ngā mahi katoa ki te tarai i ēnei rakau kia puta te tāonga nei.

Kua oti kē te whakamānu kia kitea e pehea na tana haere i runga i te wai.

Hei tāna, “tino ataahua tino horo huri poto ēra mea katoa māmā.  Iaianei ngā waka katoa e taraitia ana e mātou āmuri mai kia pērā kia rite ki tērā.”

Ahakoa hokona kia wai, he tāonga ka noho hei tauira mo ngā waka āmuri.