Ngā kaupapa: Business, Employment

Kei te hiahiatia he kaimahi huarākau kiwi

Mere McLean
  • Waikato/Te Waiariki

Ko tā Michael Franks, tumu whakarae o te kamupene huakiwi o SEEKA, atu i tēnei wā ki te Pipiri, ka tino mate kai-mahi rātou. He kotahi mano, e rua rau ngā kaimahi e hiahiatia ana hei kohi, hei whakarite hoki i te huarākau kiwi mō te hoko atu ki tā wāhi. Ki tā te tumu whakarae anō “kei konei te huarākau Kiwi engari karekau ana he kaimahi”.

“E rua ngā take, tuatahi kāre he tāngata hei whakahaere i ngā mīhini hei whakahaere i te hauhake, ā, kāre e nui ngā kaimahi mo te tiki atu i ngā huarākau, ko te raru ka tae tūreiti ki o mātou kaiwhakatipu”. Nō te tau rua mano mā toru i uru a Michael Franks hei tumu whakarae mo SEEKA, rua mano, whitu rau rima tekau ngā tūranga mahi ka puta i te wā o te hauhake, toru rau ngā kaimahi kei te hiahiatia e rātou.

“Me māmā ake, tuatahi kia uru mai ngā kaimahi o Aotearoa ki te mahi, kia whai wāhi te hunga haere ki te hara mai ki te mahi i ngā wā o te hauhaketanga”. Waru tekau paihēneti o ngā huarākau kiwi ka ahu mai, mai tēnei rohe, Te Moananui a Toi, na whai anō te karanga nui mo ngā kaimahi.

“He nui tonu ngā huarākau kiwi hei te whakatōhia, ā, kei te tipu ngā huarākau hōu nō reira he nui ngā mahi kei te haere mai nō reira me whakatikahia te raruraru inaianei ki te kore ka raru hei ngā rā kei tua”. E whakapae ana ngā kaiwhakatipu huarākau kiwi hei te tau tekau mā iwa ka eke ngā mahi tuku ki te kotahi ira waru piriona tāra.