Kaupapa: Tainui

Kei te hiahia a Waikato-Tainui kia noho tinana whakarawe a rātou marae

  • Tāmaki Makaurau
  • Waikato/Te Waiariki

Kei te hiahia a Waikato-Tainui kia noho tinana whakarawe a rātou marae.  Ka whakatīnana kē taua kaupapa ki te marae o Makaurau i Ihumātao i Māngere.

Ko tō rātou Kōhanga Reo, tētehi o ngā kaupapa matua o tā rātou Rautaki Whakawhanake Marae.

E ai ki a Ike Rākena, “I titiro ai tō mātou kaumātua a Dan Roberts ki ā mātou tamariki, mokopuna e haere ana ki kōhanga kē atu.  Ko tāna nei whakaaro, aue, he marae tō mātou, he whare hoki nō mātou, ana, tukua mai ngā tamariki hei ako ai i ngō mātou taonga tuku iho, i raro anō i tērā maru o Waikato me Te Kīngitanga.”

Ko tētehi atu kaupapa, ko te whakahaere māra otaota Māori.

E wānanga ngātahi ana a Waikato-Tainui ki te taha o ā rātou iwi ki te hanga rautaki kia noho tauwhiro ai ō rātou marae, i mua i te paunga o te tau rua mano rima tekau.

Hei tā Rahui Papa, “He aha ngā mea me matua noho mai i roto i te marae, kia kīa mai rā, he marae o te ao hurihuri, ka tahi, ka rua, he pēwhea te āwhina i te iwi, ki te whakatīnana i ngēnei tōmina.”

E ono ngā hui kei te toe, kua whakaritea e Waikato-Tainui mā te iwi hei āta whiriwhiri i te kaupapa nei.  Āpōpō tū ai tōna hui tuarua ki marae o Te Puea, ki Māngere nei.