Ngā kaupapa: Environment, Water

Kei te āwangawanga te hāpori o Hunua ki te takanga o te matū 1080

Te Kāea
  • Tāmaki Makaurau

Hei tērā takurua ka ruia te paihana 1080 ki ngā pae maunga o Hunua, te wāhi e takoto nei ngā puna whakarato wai Māori o Tāmaki Makaurau. 

Koinei te whakatau nui i puta ake i te kaunihera o Tāmaki Makaurau inakuanei, engari kei reira anō ngā nawe a ngā iwi whai pānga ana whai muri i tētahi hui i waenga i ngā iwi me te kaunihera inanahi nei.

Ko Dennis Kirkwood, he uri nō Ngāti Tamaoho, he iwi whai pānga ki tēnei takiwā, te paemaunga o Hunua.  Ko rātou me ētahi atu iwi e ono e whakapapa ana ki te ngahere nei.

Nōnanahi nei ka whakaae te kaunihera o Tāmaki Makaurau kia ruirui iho i te paihana 1080 ki Hunua.  Engari, ko te whakahau a te iwi noho he pai ake kia hoatu tēra mahi ki ngā rangatahi e kimi mahi whaioranga ana.

E ai ki a Dennis Kirkwood, “Kia aukati tēnei mahi, kia hoki mai te mana ki a rātou rangatahi, ki a tātou whānau.  He mahi anō tēnei mā rātou.  Ko tāku, he mahi tūkino tēnei.”

He kaitakawaenga taiao ō-mua a Eru Thomspon mō te Kaunihera, ko ia hoki tētahi o ngā kaipatu kīrearea ki tēnei wāhi, engari kei te marama ia ki ngā whakahau a Kirkwood.

Hei tāna, “Āe, kua whakaaro te kaunihera e tika ana, engari e tika ana me tautoko mātou i ngā iwi, ehara.  He nui ngā tāngata pēnei i a tātou i pakanga mō ēnei tūāhuatanga.”

He tekau mā whitu mano heketea te whānui o te whenua ka ruia atu ki te paitini 1080.  Ko te wai e rere ana ki waenga i aua whāruarua ko te ono tekau ōrau o te wai e rato ana i ngā kāinga o Tāmaki Makaurau.

Hei tā Thompson, “I runga i te mōhio ko a tātou wai tērā.  Koirā te oranga o te iwi.”

Ahakoa kua whakamanatia te mahere, ka whakawhiti kōrero tonu ngā iwi me te kaunihera kia māmā ai te huarahi whakamua.  Hei te takurua a tērā tau ka tīmata ngā mahi ruiui.