Kei te aro atu Te Rūnanganui o Ngāti Porou ki te tuku i ō rātou pūtea ki te hoko whare kaporeihana

Heeni Brown
  • Te Tai Rāwhiti

Tērā tētahi whānau i Kaitī kua hoko i tō rātou whare kaporeihana whai muri i ngā tau whā tekau e noho ana ki tōna whakaruruhau. 

Otirā, e manahau nei rātou i te whakaaro, tērā ka noho mai ko te iwi hau kāinga hei rangatira ki ngā kāinga rēti o tō rātou nei takiwā.

I te hokotanga a te Kāwanatanga i ngā whare tawhito o Housing New Zealand, kei te aro atu Te Rūnanganui o Ngāti Porou ki te tuku i ō rātou pūtea ki te hoko whare mō te hapori.

Kei Kaitī te matatorutanga o ngā whare kaporeihana, ā, me uaua ka kitea tētahi whānau e mau taitara ana ki to rātou whare, engari ko te whānau Tuwairua tēnā.

Horekau Te Rūnanganui o Ngāti Porou kia tata noa ki te hoko i te ono rau neke atu o ngā whare kaporeihana kei tō rātou rohe, engari kei te titiro kē atu.

Ā, i te nohonga tonu o ngā whare kaporeihana ki te mana whakahaere o te kāwanatanga, ko tā te whānau Tuwairua me kaha ake ngā mahi tiaki.

I mea ake te Pirimia i te rā nei, kua hui te kāwana me ētahi o ngā iwi, kaporeihana whakahaere whare-hāpori hoki, engari e tawhiti rawa atu ana te whakatau pēnā rānei ka hokona atu he whare kaporeihana ki a rātou.

Koirā tā Koromatua Meng Foon, kua koretake te kāwanatanga ki te whakahaere i ngā whare kaporeihana o tōna rohe, ā, pai ake pea ngā Rūnanga a iwi e whakahaere i ngā whare nei.

Hei tā Meng Foon, “Ināianei ka kite au ko ēnei whare he paru, he pakaru, he pakaru ngā wini”

E ai ki a Teepa Wawatai te tumu whakarae o Te Runanganui o Ngāti Porou, me puta te Karauna ki te āta whakatau he aha ā rātou e hiahia ai mō ngā whare-kaporeihana.