Kei rō Kōti te Poari Māori Motuhake o Tamaki Makaurau

  • Tāmaki Makaurau

No te ra nei, ka timata te nohonga a te Kooti Teitei o Tamaki Makaurau, he mea hika ake i a Willie Jackson, te tumu whakarae o te manatu noho taone o Manukau, o MUMA, ao ake i te korenga ona i whai i tetahi ngā tūranga mātāwaka e rua, ki te Poari Māori Motuhake o Tamaki Makaurau.  

Ko Tony Kake tēra, i tohua e te paepae kōwhiri i te marama o Akuhata hei mema mātāwaka mo te Poari Motuhake Māori o Tamaki Makaurau.

No te ata nei, ka timata tēnei o ngā roia a Willie Jackson, ko Te Kani Williams te ingoa, te tuku atu i ngā tāpaetanga kōrero e mea ana, kihai a Kake i tuku pepa taunaki mo tana tono ki te tūranga mātāwaka, ahakoa i puta ngā pepa taunaki e iwa i ngā rōpu mātāwaka o Tamaki Makaurau mo Jackson.

Ko tā Willie Jackson, “He tino whakahirahira tenei kaupapa mo to tatou iwi e noho ana ki nga taone, i te mea, kahore e tika ana, mo nga iwi ki te whiriwhiri ta matou kai kaikorero.”

Ko tā te roia a te Heamana o Te Poari, a Tame Te Rangi, ahakoa kihai a Kake i whai pepa taunaki kihai tēra i whai pānga kino ki tana tono.

Hei tā David Taipari o te Poari Māori Motuhake o Tamaki Makaurau, kihai ratou mo te tuku korero a kāmera mai, engari ka noho pūmau te Poari Māori Motuhake ki te whakatau ka puta i te Kooti Teitei a te kapinga ake o tēnei kēhi.

Ko Te Minita Take Māori, ko Pita Sharples tetahi o ngā kaiwhakahoki mo te kēhi nei. He kaitaunaki te Minita ki te Poari Whiriwhiri me āna tukanga, mēna he raru ka puta i te kōwhiringa, ka taea e ia te uru atu.

Ka mutu te nohonga kooti nei, hei apopo.