Kaupapa: Entertainment

Kei ngā iarere anō o Te Tai Tokerau a Tautoko FM

Dean Nathan
  • Te Tai Tokerau

Kahore anō kia hipa te wiki kotahi nō te weranga o Te Reo Irirangi o Tautoko FM ki Mangumuka, kua tīmata anō āna whakapāhotanga ki te ao.

Kāre anō kia tau tonu nā te aha te ahi i hika ai, heoi, ko te tirohanga whakamua a ngā kaimahi, e ū ana.

Kua noho puku ngā kaimahi o Tautoko FM mai i te toronga o tō rātou teihana e te ahi.

Hei tā te ūpoko o Tautoko FM, tā Cyril Chapman, "He nui rawa atu ngā painga o tēnei tahuna.  Kāore tētahi i aituā, ā, e whakapāhotia anōtia e mātou.  Tokomaha hoki ngā tāngata e hiahia ana ki te āwhina i a mātou."

E tāria tonu ana kia puta ngā pūrongo a ngā pirihimana me te ratonga tīnei ahi mō te take i wera ai tō rātou nei taonga.

I kii mai a Chapman kua whai inihua te whare, me ngā taputapu o te reo irirangi.

Hei tāna, "Kua hinga katoa ngā taputapu, āe ngā mea katoa, ngā mihini katoa engari nā Papa George i hōmai ēnei mihini whakapāho tonu ana hoki tō tātou taonga nei."

Ki ngā matapae, i roto i te tau ka ara mai anō Te Reo Irirangi o Tautoko FM i ngā pungarehu hei tino taonga mā te iwi o tēnei takiwā.

I roto i te wā poto kua whai tautoko mai i ngā tōpito o te motu me te ao hei whakatīnana i te kaupapa.