Kei mua i te aroaro o te kōti tētahi o ngā tama o Kingi Tuheitia

  • Waikato/Te Waiariki

Kua puta mai tētahi o ngā tama a te Kingi Maori, ki mua i te aroaro o te kōti takiwa o Tāmaki Makaurau mo ngā whiunga uru poka noa, tāhae hoki.

Ko Korotangi Paki tērā i whakaae ki ngā whiunga, ā, i mua i te nohonga kooti, i mea rā a Kīngi Tuheitia i roto i tētahi purongo-ā-tuhi, arā ngā utu me ea e tana tamaiti.

I kuhu pāpā kore atu a Korotangi Paki, te tamaiti a Kīngi Tuheitia ki te Kōti, ēngari ko te ringa maui tonu a tōna pāpā a Tukoroirangi Morgan hei whirinaki mōnā.

I āmenehia ngā whiunga e rua mo te uru poka noa, tētahi mō te whanako e Paki, tekau mā waru tau te pakeke. 

Koia me ngā taitamataane tokotoru anō ērā i uru poka atu ki tētahi whaitua ki te tahae i ētahi papa heke ngaru. I takea mai te ngako o te raru nei i a ia e ako ana ki te Kura Ataata o Toihoukura i Turanga.

Engari, ēhara tēnei i te wā tuatahi, kua puta titaha mai a Paki ki mua i te aroaro o te ture. I te tau rua mano tekau mā tahi, i puta ngā whiunga taraiwa horo, whai muri i te tukinga o te motoka i taraiwangia e Paki ki tētahi pou hiko i Rāhui Pokeka.

Hei tā Kīngi Tuheitia, i roto i tētahi ripoata i puta i a Fairfax Media, he tamaiti wāwāhi tahā tana tamaiti, engari, ka puta ia hei pāpā aini, a, me whakatika mai anō ia i a ia anō.

Hei ta te māngai a te Kīngi, a Tukoroirangi Morgan, ka whai waahi atu a Paki me ērā atu o ngā kaihara, ki te kawe ake i tētahi rautaki tikanga Māori a te iwi e hohou anō ai te rongo.

Ka hāmenehia a Paki mō ngā whiunga a te tuatoru o Hurai.