Kaupapa: Tā moko/Kirituhi

Kātahi anō ka wikitōria a Alex Christie i te kōwhiringa whakamahana o te whakataetae kirituhi nui rawa i Aotearoa

Aroha Treacher
  • Tāmaki Makaurau
  • Te Tai Rāwhiti

Kātahi anō ka wikitōria a Alex Christie i te kōwhiringa whakamahana o te whakataetae kirituhi nui rawa i Aotearoa nei ko Miss Ink i Tāmaki Makaurau. Nō te pitopito kainga o Te Wairoa i Te Matau a Māui, ki tāna, me tū pakari ngā wāhine e mau tā moko, tuhikiri rānei me kore e aro atu ana ki ngā whakahēnga a te tinana. 

He mahinga toi tōna tinana, ko tōna kiri te kānawehi, he kōrero tō ia kirituhi.

"Kei te tū whakahīhī āhau, nā te mea, he kōrero tō ia moko o tōku ake oranga.  Ka kohikohi hū, kākāhu ētahi engari kei te kohi kirituhi āhau," ko tā Christie kōrero.

Arohaina katoa ana a ia i tana ūkaipō i Iwitea Marae, kei waho tata o Te Wairoa.

Kua whā tekau ngā tau tana matua kēkē e tā moko ana, e tuhi kiri ana rānei, nāna nei ōna tā moko i mahi.

I kitea nei e ia te waiaro o te iwi whānui i ēnei rā ki ngā wāhine e mau tā moko ana.

"I ngā tau rua tekau kua horī kāore ngā wāhine e mau tā moko ana, engari i ēnei rā, kei te mau tā moko te katoa, otirā ko ngā tāngata nō iwi kē atu hoki. Pai ki a rātou ngā kōnikoniko engari ehara ko tēnā te mea nui, ko te tikanga te mea nui."

Ngākaunui katoa ana aia i tana iraimutu, engari kāore a ia e tū ki te atamira tana whakahoki tīhohe.

Ko tāna hoki ka tū te ihu o ētahi ki ngā wāhine e mau kirituhi nei, engari nā tana wikitoria i Miss Ink, kei te whakakaha i a ia anō kia pare ai ki te taha ngā whakahētanga.

"Nā aua tā moko i puāwai taku ātaahuatanga, te whakahiamo hoki, he mea hei whakapakari i a ia anō."

Kāore anō tēnei tāonga whakahirahira kia oti noa, mō tēnei wahine toru tekau mā iwa ngā tau, i aia e hīkoi tonu ana, ka hāngaia tonuhia āna moko.

Ka whai wāhi atu ngā wāhine tekau mā rua nō Tāmaki Makaurau, Pōneke me Ōtautahi i te whiringa toa hei tēnei Whiringa-a-Nuku i Parnell, Tāmaki Makaurau.