Kaupapa: Te Matatini

Kāre he pūtea tautoko ano ka puta i te Kawanatanga mo Te Matatini

  • Waikato/Te Waiariki

Ko Te Matatini te huihuinga nui rawa i runga i te maramataka Māori, ka muia e te tini ngerongero.

Nō reira te pātai, me aha hei whakarite i a ia, he aha rawa rā te nama, ā, mā wai ngā nama e utu?

Ko te whakapae he tekau mano tāngata i hau atu i te rangi tuatahi. Tuia ki tēnā te kotahi mano rima rau kaimahi, ā, kātahi rā te taiopenga uara nui.

Ko tā te tumu whakarae o Te Matatini a Darrin Apanui “i a tau he kotahi ira rua miriona tāra te pūtea tautoko ka whakawhiwhia e te rōpu whakahaere, mā tērā ka whakahaerehia ngā kaupapa katoa o Te Matatini.”

Nō reira i te mutunga iho o aua nama, hei tā Darrin Apanui, he rua rau mano taara e toe ana mo te whakataetae nei. Ā i runga i te mōhio he rima miriona te nama mo tēnei o ngā Matatini, he mahi nui te rapu pūtea tautoko. Ko te tono ki te Kāwanatanga kia whakarahi ake i te tahua.

Ko tā Apanui e tika ana kia whakarahi ake i te tautoko mo ngā mahi a Rēhia na te tino whakahirahira o aua mahi ki te aō Māori, whānui hoki.

Ko te whakahoki a te Pirimia ki tera, “e whakapono ana ia he wāriu nui tā te mahi o Te Matatini, heoi koira te hiahia a te marea te whakarahi ake i te pūtea tautoko, heoi ko tāna ano i te nuinga o te wā e kore e taea.”

He wha miriona tāra te pūtea tautoko kua whakaritea e te Kawanatanga mo te New Zealand Ballet, ā he tekau ma toru miriona te pūtea ka whakatahangia mo te Symphony Orchestra.

Ko tā Apanui he wero nui te mahi i a rua tau te whakaritea i Te Matatini, ko tāna e āta awangawanga ia ki te nui o te pūtea ka hāere ki kaupapa kē.

Heoi ko te whakahoki a te Pirimia ki tēra he pai noaiho te pūtea kua tukuna kia Te Matatini, kāre he pūtea anō tā te Kāwanatanga hei tuku atu kia rātou.

Kāti ko ngā kurakura ki te Kāwanatanga i kitea hoki i te papa whakatū waewae, he papa whakaputa i ngā nawe. No reira arā ngā wero ki te Kāwanatanga, me te wawata nui ka aro mai te pirimia.