Kaupapa: Kōhanga Reo

Kāre ano kia tau ngā amuamu a te kāhui Kōhanga Reo o Mataatua/Tauranga Moana

Mere McLean
  • Waikato/Te Waiariki

Kāore te kāhui Kōhanga Reo o Mataatua/Tauranga Moana i te pāpouri i ngā kitenga kua puta ake i te pūrongo motuhake mō te poari kaitiaki o Te Kōhanga Reo. 

Heoi, ki tā te kaikōrero mō te kāhui nei, ka tohe tonu tā rātou wero atu i tā te poari kaitiaki whakahaere mō Te Pātaka Ōhanga me te tohutanga o ngā mema o te poari. 

Ki tā Lorraine Vercoe o te kāhui Kōhanga Reo o Mataatua/ Tauranga Moana, kihai te pūrongo arotake i te poari kaitiaki o Te Kōhanga reo i kapo ake i ngā tino take i whārikihia e tōna kāhui i te timatanga.

Hei tāna, “ki toku nei whakaaro, kāre i ruku ki te hohonutanga, heoi ano, me noho te iwi, me noho te rohe ki te korero, he aha te aha inaianei.”

Heoi, ka haere tonu ngā wero mai te kahui Kōhanga Reo o Mataatua/ Tauranga Moana ki ngā whakahaere o te poari matua o Te Kōhanga Reo.

E ai ki a Lorraine, “I roto i tāua purongo, he recommendations kua kitea, he mahi ta te poari hei whakatika, kei te whakatikatikahia i tēnei wa, me korero ano tatau i tērā āhuatanga, he aha i perahia ōna korero, kei hea te hohonutanga o ētahi kaupapa kua kitea e te Ernst Young.” 

Na te panatanga o te Tumu Whakarae o mua o te Kōhanga Reo a Titoki Black i ara ake ngā urupare mai te kahui Kōhanga Reo o Mataatua/ Tauranga Moana ki roto i ngā whakawhiu i tau ki runga i a ia, a, ka tahuri te titiro ki ngā whakahaere o roto o te poari kaitiaki.

Ko tā Lorraine ano, “He tikanga ano, tā wetahi, he tikanga ano mo wetahi, no reira me whakatikahia, kia ōrite te tū, kia tu māro tonu, ki runga i te kaupapa i ara ke e Mataatua.”

Ko tā te rohe o Mataatua/ Tauranga kia hoki tātau ki ngā kaupapa matua o te Kōhanga Reo, kia whāngai i te reo Māori me ōna tikanga ki o tatau tamariki, mokopuna, kāre e kore he kaupapa ēnei ka puta i roto i te hui Kōhanga, ka tū ki Turangawaewae Marae, hei te marama.