Kaupapa: Kapa Haka

Karahuihui ai te marea ki te hui Te Mana Kuratahi 2015

Wepiha Te Kanawa
  • Waikato/Te Waiariki

Ko te whakataetae kapahaka ā-motu o Te Mana Kuratahi tērā i hika ake ki Te Papaioea i tēnei rā.  He tata ki te toru mano tāngata o te iwi kāinga i whai wāhi atu ki te haka pōhiri i tēnei ata.

Ko ngā tae o ngā kura ērā e kitea ana ki te taiwhanga o Manawatū, me te mea hoki koinei te pōhiri nui rawa atu kua tū ki Rangitāne mō te wā roa.

Hei tā Denise Marshall, “Kua roa te wā e whanga ana mātou mō te iwi ki te eke mai i tēnei rā tonu , ohorere mātou katoa te kite i te tini me te mano e eke mai ana."

Inā te nui o tēnei whakataetae kua eke ki tua o tērā i tū i Tauranga Moana i te tau rua mano tekau mā toru.  Ko Te Kura Takawaenga o Te Wharekura o Ruatoki te kapa tuatahi o ngā kura whā tekau mā whitu nō ngā pito katoa o te motu ki whakapau haka ki runga i te papa whakatūwaewae,

Hei tā Timoti Harawira, "Harikoa taku ngākau i ngā mahi kua oti i ngā tamariki, ki ahau kua oti pai te tū tā rātou tū, te tū o Tūhoe.

Ko ngā toa o te wā, Te Wharekura o Rākaumangamanga rāua ko ngā toa tuarua Te Tira Haka o Maeroa ka tū apōpō.