Kāore he take te poro waewae ki te kaihoe waka ama

Aroha Treacher
  • Te Tai Rāwhiti

He tauira pai te kaihoe hauā a Peter Cowan, ahakoa i poro tōna waewae ka whai oranga tonu ia. Koia te pōtiki o ngā kaikoe tekau mā rua i te tira NZ Para Waka Ama Sprint, ko rātou e ahu atu ana ki te whakataetae o te ao ki Tahiti.

I poroa tōna waewae i te tau rua mano tekau, mai i taua wā e ngākaunui ana te tama nei, e rua tekau mā rua ōna tau, ki te waka ama.

"Whai muri i te aitua-a-waka tē tāea e au te tākaro i te whutupaoro, te pā whutupaoro rānei, aua momo hākinakina, nā i aro au ki hākinakina ka tāea e au, nā, i arohanui au ki te waka ama," ko tāna e kī mai.
 

"E rata ana ngā tāngata katoa ki aia, i tērā tau i whai waahi ia ki te reehi NZ Para Long Distance ki Tahiti, i reira rāhiritia mai te iwi kainga ki aia," tā Honoria Ropiha, kaiwhakahaere o te tira.

Ko tana whainga matua kia whai waahi atu ki ngā taumāhekeheke hauā ki Tokyo i te reehi VL3.

"Koira te whainga matua, heoi i tēnei wā tonu me eke ki te taumata o ngā tira a-ao, a-motu hoki, ko tāku e hiahia ai," tā Cowan.

Nō Heretaunga a Cowan, tokotoru katoa o rātou nō Te Matau a Māui i tēnei tira tekau mā rua te rahi, ka whakataetae rātou katoa ki Tahiti hei tēnei Hōngongoi.