Kaupapa: Rugby

Kāore he kaitākaro kotahi o Raukura i whiriwhiria ki te kapa kura tuarua ā-motu

  • Waikato/Te Waiariki

Haruru pai ana te kura taitamatāne o Rotorua i te rā nei.  Kua pōhiritia ōkawatia te ipu mana nui o te motu ki te kura.

Engari, he wairua kawa anō i toko ake i te pārekareka o te rā.  Kāore he kaitākaro kotahi o Raukura i whiriwhiria ki te kapa kura tuarua ā-motu.  Nā whai anō ngā māharahara a ētahi.

Mā te aha i te haka o te kura e tū ai te ihiihi o Raukura.

Kua hoki mana nui mai ki te kura i te rā nei.  He whakaatu i ngā rawa o te pakanga te mahi.  Ko tōna tikanga ka rongo a Raukura i te wairua pārekareka, engari ehara rawa i te pērā mō te kaiako matua, mō Ngarimu Simpkins.

Tērā ngā pātai he aha ia te take kāore he kaitākaro Raukura kotahi kei te rārangi rima tekau mā toru te rahi mō te kapa matua o te motu, i whakaīngoatia i te Rātapu.

Ko Raukura anake te kura puta noa i te ao kia toa karapīpiti i te whakataetae kura tuarua ā-ao.  Ā tērā tau puano haere pērā atu anō ai te kapa hei kanohi mō Aotearoa.  Heoi, kua motukia i konei te kounga ā-motu mō tēnei tau.

Kua toru rā ināianei a Te Kāea e ngana ana ki te whakapā atu me ēnei nawe a Raukura ki te uepu whutupōro o te motu.  Engari tonu i te rā nei, auare ake.

Ahakoa kāore a Raukura i te whai rawa pēnei me ētahi atu kura o te motu, ka kitea tonutia ngā hua.