Ka whawhai tonu ngā māngai o Mangatangi Marae

Heeni Brown
  • Waikato/Te Waiariki

Ko ngā hua kino o te kaipuke o Rena, me te maha noa atu o ngā kamupene maina e tūkari ana ki te keri ki Aōtearoa te putake o te whawhai a ngā uri o Mangatangi Marae.

E ai ki ētahi māngai o Mangatangi i runga i te hotaka o Te Tēpu kei te whakaritea e rātou he tono apīra e whakahe ana i te whakaaetanga o ngā Kaunihera e rua o Waikato kia keri maina a Glencoal ki tā rātou takiwā.

Ko tā ngā kaikorero, he taumata tēnei kua tau kē ki ētahi Iwi, mei kore ka tau atu ano hoki ki te maha noa atu  na te kaha taunaki o te kāwana ki o te ao he waahi pai a Aotearoa mo te keri kohinu, kohuke me te maha noa atu.

Ko te whakatau a ngā roia e kore pea he painga ka puta mo ngā uri o Mangatangi i te apīra, heoi ka tuku tonu rātou i taua tono hei te Taite.

Ko tā George Katipa o Waikato, Ngāti Amaru kua kitea e ia ngā hua kino o te mahi maina, kua rongo hoki i a i ngā kōrero o ngā kamupene keri, heoi ka anga whakamua tonu te iwi.