Kaupapa: Education

Ka whakautua ngā rangatahi Māori he aha tā te Māori i tēnei rautau

  • Tāmaki Makaurau

Nā tētahi kiriata poto kua whakaritea e te ohu 'Ngā Tauira Māori' (NTM), arā te wāhanga tauira Māori o te Whare Wānanga o Tāmaki Makaurau, kua tū ngā pihi o ngā kaimātaki ā-ipurangi.

I whakaritea tuatahitia tēnei kiriata poto mō tētahi whakataetae mō ngā tauira whare wānanga o te motu, ā, i whakaatuhia taua kiriata ki Te Huinga Tauira ā-motu i tērā wiki i tū ki Te Papaioea.

Ko te kaupapa o te whakataetae ko te whakautu, "he aha tā te Māori i tēnei rautau rua tekau mā tahi", ā, hakoa i whai tēnei kiriata i te tūranga tuatoru, kua huri āmio te kiriata i te ipurangi me ngā rongopai o te nuinga ki tā rātou mahi.

Hei tā te kaihautū o te kiriata o NTM, tā Hiku Jackson, "He hiahia nō mātou te tuku pānui ki ngā tāngata noho katoa ki Aotearoa nei e pā ana ki a Ngāi Tātou, me kii, ngā piki me ngā heke.  Pērā ki ngā momo rōpū Māori kei ngā whare wānanga o te motu, he reanga hōu e ara ake nei me te hiahia kia panonitia ngā whakaaro a ētahi."

Ko te whāinga matua o te kiriata nei kia whai reo ai ngā taiohi Māori kia matapakihia ngā take nui e pā ana a Ngāi Māori, me te whakahē i ngā parahako ā iwi kē atu.

"He huhua ngā kōrero o te marea mō te kiriata nei.  He nui ngā kōrero pai nō ngā uri Māori huri noa i te motu, nō tāwahi hoki, ko ētahi i kii i tangi hotu rā i te kitenga atu o tā mātou kiriata," te kii a Hiku.

Kua tohaina te kiriata nei ki runga pukamata e ētahi kaitakaro Ōpango ō-mua, e ngā pāti tōrangapū, e ngā reo irirangi hoki.

Mātakihia, tohaina rānei te kiriata poto mā YouTube.

** He mea tuhi nā Te Raukura Solomon rātou ko Nathaniel Howe, ko Hikurangi Jackson.

Nā Hikurangi Elijah Kimiora Jackson i hautū, i panoni.

He kiriata e whakamārama ana i ngā whakaaro rangatahi mō te tūranga a te Māori i tēnei rautau.  Kāore he kaiwhakaari whai utu, he mema noa o te ohu 'Ngā Tauira Māori' e whakaputa whakaaro ana.