Kaupapa: Education

Ka whakatūria e tētahi Kura i te Matau ā Māui i ō rātou whāre hōu

Aroha Treacher
  • Te Tai Rāwhiti

Ka whakatūria e Te Kura Kaupapa Māori o te Wānanga Whare Tapere o Takitimu i Heretaunga ō rātou whāre hōu i te wāhi o Maungawharau.  Koirā te kura Māori tuatahi rawa i taua rohe engari ko te mea mīharo, ka whāngai atu rātou te mātauranga Māori mai i te pito ki te urupā, he tuatahitanga tēnei mō Te Ika a Māui.

Kua ea, ki Havelock North tū ai tētahi kura Māori hōu.  Kua whiwhi rātou i te reta ōkawa nō Hekia Parata, he reta e mana ai tō rātou tū hei wharekura.

E ai ki te tumuaki, a Fleur Wainohu, “Tino harikoa āhau mō te whānau nei, mō ngā tamariki, he reta tino pai rawa atu nā te mea, ko tērā te whakamana te whakatau o tā mātou moemoeā.”

Ka whāngai atu rātou i te mātauranga Māori ki ngā tamariki mai i te kōhanga, ki te kura kaupapa, wharekura atu ki te whare wānanga.  Ka whakatū hoki he taikura, he wāhi motuhake mā ngā kaumātua.

Hei tā Narelle Huata, “Ko tērā hoki te moemoeā o tōku pāpā a Tama Turanga Huata, me tā mātou koroua a Te Kenana Wi Te Tau Huata i kōkiritia ai tēnei kaupapa mō te whānau nei, nā reira tino harikoa te whānau, kua tae te wā.”

Ko te tikanga ka whakawhānui ake tō rātou rārangi tauira mai i te whitu tekau ki te toru rau, engari e ono rau te nuinga o ngā tauira ka taea.

Ki tā Wainohu, “Ko tētahi o ngā painga kei roto, he whānau kōtahi mātou pai ake mō ngā tamariki ki te whakarongo ki te reo Māori ki te tuhi i roto te reo Māori me whakaaro i roto i te reo Māori.”

Kei te haere ngā whakamahere whare, ko te tūmanako, ka huakina ngā kuaha hei te paunga o te tau rua mano tekau mā whitu.