Ka whakatōngia he tipu manuka ki te whenau i kainga e te ahi

Aroha Treacher
  • Te Tai Rāwhiti

 Ka whai oranga hōu he whenua Māori e kōtahi rau heketea te rahi i kainga e te ahi te tērā tau ka whakatōngia he ono tekau mā rima mano ngā rākau Manuka ki taua whenua rā, ko te whai kia hoko miere Manuka.
 
He mea kumanu ēnei pihinga tekau mā rima mano e ngā mauhere o te whareherehere o Te Matau a Māui.

"He mea tautoko i a rātou ki te whai maaka, whai mātauranga tiaki tipu me te mārama i ngā mea hauora i te wā mahi," tā Dave Collier, kaiako. 

Nā te whare herehere, Te Kaunihera a Rohe o Te Matau a Māui, te tarahiti Māori nei o Matai anō hoki tēnei kaupapa i whakatū hei whakarauora i te whenua o Ripia, tērā i kainga e te ahi.

"Ko te mea mātua ki a mātou, he huarahi tēnei mō ngā mauhere ki te tautoko i tō rātou hapori," tā Susan Hamilton, kaihautū tuarua o te whare herehere.

E hiahia ana te tarahiti Matai kia hanga i tā rātou ake miere Manuka, he whainga e tutuki ai mā ngā ringa raupa o te whare herehere nei.

 "He mahi tino pai tēnei, tērā pea ka whai huarahi pēnei anō mātou hei ngā rā heke mai nei," tā Collier.
 
I tēnei wā tonu he tekau mā rima mano ngā tipu ka whakatōngia hei te marama o Hune, he rima tekau mano ka whakatōngia hei tērā tau.