Ngā kaupapa: Kapa Haka, Te Matatini

Ka whakarite a Te Aitanga-a-Hauiti mō Te Matatini - Pūrongo Motuhake

Heeni Brown
  • Te Tai Rāwhiti

Ko Te Aitanga a Hauiti ki Uawa te mataika e ārahi ana i ngā rōpū o Waihīrere, o Whāngarā Mai Tawhiti me Tū Te Manawa Maurea nō te rohe o Te Tairāwhiti ki Te Matatini i Ōtautahi.

Ko tō rātou kai-ārahi, ko te mātanga reo Māori a Tākuta Wayne Ngata, ā, i tēnei pō, ka whakaputa ia i ōnā whakaaro mō tēnei mea te whakataetae, otirā mō ngā whakaritenga whakawā i Te Matatini.

I kōrero a Heeni ki te kaitātaki o te rōpu, a Tākuta Wayne Ngata.

"Ko Hauiti te tamaiti, te pōtiki a Hingangaroa rāua ko Iranui whānau mai ko taua Wera te tīpuna o Te Whānau a Apanui. Nō muri mai ko Mahaki, ko Iwi karoro tētahi o ngā Māhaki te tīpuna o ngā hapū o roto o Waiapu nō Ngāti Porou mātou nō roto o Uawa te pōtiki i a Hauiti nei.

Me pau te kaha ki te kawe i tēnei kaupapa hei āhuatanga whātorotoro i ētahi kaupapa kē atu, heoi anō te mahi nei he whakapakari i aku tamariki tonu. Koinei taku whanau, kāre i kō atu, kāre i kō mai. Koinei taku whānau.

Kei konei tāua i tēnei wā, i te kainga o Hamoterangi ki Tītirangi nei, ki tēnei o ngā Tītirangi, tērā Hamoterangi i moe nei i a Porourangi. Ka whānau mai ko mātou, ā, i nō muri mai ka moe nei i a Tahu ka whānau mai ko rātou (Ngāi Tahu, Ngā Uri o Ōtautahi).

Kia tutuki te wāhi ki aua kaupapa, ā, taihoa nei te haka ahakoa ka waiatatia, ka hakaina i roto i tēnei ō mātou mahi ko te mea kē kei te hui te Māori.

Kaua e whāki atu ki ō whanaunga o Te Whānau a Apanui kei te wānanga a Te Aitanga a Hauiti i te rā nei mō Te Matatini me pēnei ō whatu.

Me whakataetae ahakoa he aha te mahi, kia kore ai te tangata e ngoikore o ngā whakataetae i ēnei rā ka hinga ia, engari kāre e mate engari me mate ki te eke ki ngā momo taumata o taua whakataetae.

Koina te mea pai o Te Matatini kei te kōrero au mō ngā whakataetae o roto o Te Tairāwhiti āhua neke atu i te ono tekau tau e whakahaerehia ana a Tamararo o ngā whakataetae kia puta te ihu o te tangata.

Koina te taumahatanga kua utaina ki runga i ngā powhiwhi rā o ngā kaiwhakawa, nā reira me mihi rā. Ko te āta whakamātautau i te mahi me te reo kei roto i taua waiata, haka rānei. Koina te mea me mataku te kaiwhakawā, kaua ko te kaihaka, ae, me mātau, me mōhio.

Kei te kite pea koe ki mua i au i te hanga tamariki kei te tākaro ki muri i ahau. Ko te tūmanako ko rātou anō kei te aroa kapa a te wā. Ko rātou ngā mea tino mōhio ki ngā waiata me ngā haka e ako nei mātou i tēnei wā kei muri kē ngā mātua heoi anō.”