Ka whakapāha a Whakaata Māori ki a Raimona Peni

Mere McLean
  • Waikato/Te Waiariki

I whakaariki mai a Te Arawa ki te tautoko i tētahi o rātou i pāmamae i ētahi āhua i pāhotia ai i te hōtaka ‘50 Haka Moments’ a Whakaata Māori. Ko tā Te Arawa, i takahia ngā ture whakapāho.

Hei tā te toihau a Ngā Pōtiki a Hinehopu, tā Richard Mitai-Ngatai, “I runga hoki i te mōhiotanga, kua kapohia e te pouaka whakaata nei i tērā mahi, mamae katoa o Ngā Pōtiki a Hinehopu”

Ko tā Ricky Bishop o Ngāti Pikiao me Te Arawa e mea nei, “Ka tika me hara mai a Whakaata Māori ki te tuku aroha ki a ia, i runga anō i ngā nawe e mau nei tātou katoa, a Ngāti Pikiao.”

Ko tā te whānau kia waiho ngā kāmera ki waho atu i te marae, engari ka tāea e au te kii ake i tae mai te Tumu Whakarae hōu o Whakaata Māori a Paora Maxwell ki tēnei kaupapa, ahakoa ka timata tūturu ia ki taua tūnga mahi hei te mārama e tū mai nei.  Nā te toihau mō ngā kaupapa karere o Whakaata Māori, nā Julian Wilcox i whakatakoto i te kupu whakapāha ki te iwi.

Ko tā te māngai mō Whakaata Māori, tā Julian Wilcox, i te rangi nei “Ko te mea nui kia mātou kia whakapāha atu mātou ki a Raimona, kia rātou hoki ko tōna whanau, kia waiho mā Te Arawa anō e tohu, e pēhea nei ō rātou whakaaro, me kii ki te āhuaranga o ngā mahi kua ūhia e mātou e te ahiahi nei, engari, ko te mea ki ahau ko te whakakanohi ake i a Whakaata Māori.”

Nuku atu i te kotahi rau te hunga i tae mai ki te hui, nā te kopa ki roto o te whare ka maringi mai ētahi ki waho.  Mō te whānau tonu o Raimona Peni, me whai whakaaro nui, kia kāua e tū tēnei momo whakaparahako anō.

Hei ko tā te pūkenga mau rākau o Te Arawa, tā Wetini Mitai-Ngatai e kii nei, “I mua tonu pea i te hōtaka whakaatu mai āpōpō, pai kē pea te whakapāha atu ki te iwi whānui, mā reira pea muru ai tēnei hara.”  

Kua tau te ngākau o te whānau i te taenga ā-kanohi atu a Whakaata Māori i te rangi nei ki te tuku whakapāhā.