Ngā kaupapa: Arts, Entertainment, Kapa Haka

Ka whakangahau anō ngā kaihaka o Tuku Iho i te tini ngerongero tāngata ki Amerika

  • Waikato/Te Waiariki

Ki Rotorua, ka whakangahau anō ngā kaihaka o Tuku Iho i te tini me te mano i Amerika, i tātahi o Venice i Ngā Anahera.

He whakatikatika ngā mahi ā-rēhia te mahi a ngā kaihaka o Tukuiho ka whakaratarata atu i te tini ngerongero i Amerika, Ngā Anahera, i te wāpu o Santa Monica.

“Rāwaho mai, Māori mai, Niu Tīreni mai, ngā mea kua roa nei e ngaro nei i te kāinga, he pai te kite atu i ā rātou e haere mai ana ki te mātakitaki mai i ngā kapahaka, ki te kite atu i ngā taonga o te Māori, ngā whakaairo, i ngā momo taonga i te taha o te tāmoko,” i korero atu a kaihaka, a Anaha Hiini.

“E tino rata ana rātou ki tērā.

Ko te noho haumaru te matū mā ngā kaihaka tekau mā iwa me te huhua o ngā kaiwhatu, kaiwhakaairo me ngā kaitāmoko e haere atu ana.

“Ka whakaarohia kē mātou ā mātou nā rangatira o te wāhi nei ki te toha atu tō mātou nei tikanga ngā tikanga me ngā āhuatanga Māori ki a rātou mā ngā iwi taketake o LA,” i kī mai a kaitāmoko, kaiwhakaairo hoki, a Arekatera Maihi.

Nō te tau nei i tū ai te whakaaturanga i te taonenui o Amerika i te whare pupuru taonga o Smithsonian. Kotahi miriona neke atu ngā tāngata i kite atu ngā tāonga whitu tekau me ngā mahi tāmoko, whakaairo pounamu anō hoki.

“Ētehi nō wāhi kē atu kāore i te paku mōhio ko wai te iwi Māori,” i mea mai a Hiini. “Kāore i te mōhio tēnei ko Aotearoa, nō reira, he pai tēnā. Ko tā mātou noa he whakatairanga i tō tātou ahurea, i ngā taonga a te Māori e mōhio ai rātou, ko wai mātou, nō hea mātou.”

“Ngā iwi taketake o reira, ka kite ai rātou i ngā taonga ka tau mai tētahi wairua pea kei runga ki a rātou mā, nā te mea ko ētahi o ā rātou nei taonga he orite ki tō mātou nei taonga,” i kī atu a Maihi.

Ka tūwhera te whakaaturanga ā te rua tekau mā toru o tēnei marama.