Kaupapa: Te Reo Māori

Ka whakamana Te Ataarangi i ngā rohe mō te whakarauora i te reo

Mānia Clarke
  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

Ko Te Ataarangi tētahi tino o ngā kaupapa whakarauora i te reo Māori. Ko tāna, he whakamana i ō rātou rohe kia pai ake ai ā rātou tikanga whakaako i te reo. Hei tā te Manutea o Te Ataarangi hei tā Rahera Shortland, ko te whāinga ia, ko te akiaki i te hunga kaare he reo Māori ki te reo rangatira.

Ko tā Shortland ko te tuku iho i te reo mō tēnei reanga tonu te mātāpono.

“Ko te huri i te mana whakahaere i ngā mahi kia hoki anō ki ngā rohe,” te korero a ia, “kia riro mā ngā rohe anō rātou e whakawhanake, mā ngā rohe anō e rapu āna kaiarataki ki ngā mahi whakarauora i te reo.”

Ā, e hāngai pū ana te māhere anga whakamua hōu kia tono tōtika atu ngā rohe tekau mā tahi ki Te Mātāwai mō ngā huruhuru kia rere ai te manu.

“He tukanga anō kei ngā tono a Te Mātāwai me tutuki pai ērā tono, nō reira ko te mahi a Te Rūnanga he haere ki ngā rohe ki te tautoko ki te whakaako i a rātou, ki te arataki i a rātou me pēhea te tono mō ngā putea nei,” i kī at a Shortland.

E toru tekau mā ono tau ki muri i tū ai Te Ataarangi me tana tikanga whakakaako ā-rākau hei whakarauora i te reo, me ngā tauira e rima tekau mano kua whiwhi hua.

Wheoi, hei tā Maira Pihema, mema o Te Rūnanga o Te Ataarangi, kei reira tonu ngā uauatanga.

“He torutoru noa iho ngā tāngata e tino mōhio ana ki te whakatakato rākau pēnā i tā Te Ataarangi āhuatanga ako i te reo,” i kī atu a Pihema. “Nō reira he mea nui ki a mātou ki te kimi tangata e ngākau nui ana ki tēnei momo āhuatanga ako i te reo.”

E haere tonu ana ngā kōrero hei mua i tā rātou hui ā-motu ka tū hei te marama o Noema.