Kaupapa: Health

Ka whakakotahi ngā hapū o Kahungunu mō te tauwhainga e kī ana ko MaraeFit

updated Aroha Treacher
  • Te Tai Rāwhiti

Kua tuatahi mai ngā whānau o Manutai Marae i Nuhaka i te tauwhainga e kī ana ko MaraeFit, kei tua rātou o ngā marae toru tekau mā rua o roto mai o Ngāti Kahungunu.

Ko tā rātou he kaupapa tēnei kua tīni te waiaro o te whānau katoa.

Kei te whati te tai ka pao te torea o te whānau o Manutai Marae, i a rātou e whakarite ana mō tētahi hīkoi a-whānau, e rima kiromita te tawhiti.

Pakeke mai, tamariki atu, katoa e whakapau kaha ana ki te hāpai i te kaupapa nei.

Ko MaraeFit, he kaupapa mō ngā marae o Ngāti Kahungunu hei akiaki i ngā whānau ki te tautoko i ngā kaupapa o te marae.

Nā tēnei kaupapa i whakaora anō ai te marae, nā ngā mahi hauora, korikori tinana rānei, i taki hoki mai ai ngā whānau.

O ngā marae toru tekau mā toru e whai waahi ana, ko te marae i whai piro nui, ka whiwhi tohu rātou i te pō whakanui hākinakina o Ngāti Kahungunu hei te paunga o tēnei tau, hei marae kī ana i te hunga nakawhiti rawa.