Kaupapa: Tainui

Ka whakahōnore ngā kaitiaki o Te Kiingitanga i tētehi Mokopapa

Mānia Clarke
  • Waikato/Te Waiariki

Ki te riu o Waikato, ki Ngāruawāhia, kua whakatōpū te tini ngerongero ki te taurima e rua rā o K160, kia whakarewa ai i ngā whakatairanga o te tau, mō te orokohanga o Te Kiingitanga i ngā tau kotahi rau e ono tekau ki muri. Mō ngētehi he whai i tētahi huarahi hou, kia titia te kaupapa mana nui nei ki te kiri mō ake tonu atu.

Ko te Makau Ariki ko Te Atawhai o Kiingi Tuheitia Pōtatau Te Wherowhero VII, te tuatahi o ngā wāhine ki te tā i ngōna ngutu.

Ko tā rāua tamāhine ko Ngā Wai Hono i Te Pō e whai atu nei hei whakaoti i ā rāua moko kauae i whiwhi rāua e rua tau ki muri, hei whakahōnore i te tau tuangāhuru e noho ana a Tuheitia hei Kiingi Māori.

“Inā hoki rā, koia pū tērā whai wāhi ai te haukāinga ki te rongo i te tere o te toto, i te tapu o te ngārahu, i te haehaetanga o te uri i a Uetonga,” i mea atu a Brad Totorewa (Waikato). “Hei tohu anō i te tōtā heke o te rae o roto nei i ngā tau kotahi rau ono tekau tau e pīkauria ana e Waikato tēnei kaupapa, tēnei taonga me kī e kīa ana ko Te Kiingitanga.”

Nō Taranaki maunga a Te Aorangi Dillion e aru ana i ngā waewae o tōnua tupuna whāea, hei whakamanamana i ngā tātai hononga ki Te Kiingitanga.

“He kaupapa nui tēnei tō mātou ki te kāinga,” i kī atu a Dillion. “Ki Ngāruahinerangi, ko mātou te Kiiwai Wairua, anā, ko te Kiiwai tangata e noho mai nei ki Te Kiingitanga. Kua whakaaea e te iwi me kī, kua whakaae e tōku whānau, nō reira, ehara ko au te kaupapa. Ko tēnei te kaupapa.”

Nō ngā iwi o te motu ngētehi o ngā tohunga tāmoko e tākoha nei ā rātou pūkenga ki ngā uri whakaheke o ngā pononga.

“Tūmeke, mīharo pai,” i kōrero atu a Dillion. “Koirā tētahi o ngā tohu kei te mau tonu mātou ngāi Māori ki a mātou tino rangatiratanga. Kei konei tonu tātou katoa e ngana ki te whakaatu ki te ao ō tātou nei pūkenga, ō tātou nei iwitanga, hapūtanga, whānaungatanga, he tohu pai Te Kiingitanga mō tērā āhuatanga.”

“Ko te kaupapa matua e noho ana hei tūāpapa mō te tāmoko i tēnei rā, ko te whakamānawa i te kotahi rau ono tekau tau kua tō, me te aro whakamua ki te kotahi rau ono tekau tau kei te aroaro,” i mea atu a Totorewa.

Hei te pō nei tīmata ai te ngāhau o Tuu Ka Hira me ngā manutīoriori a Maisey Rika, Ria Hall, Rob Ruha Annie Crummer, the Koi Boys me 3 Houses Down. Ka mutu, he whakakitenga mumurua hei whakamīharo i te huihuinga.

Āpōpō haere tonu ai ngā whakamānawa me te terenga o tētehi kāhui o ngā waka kotahi rau e ono tekau i runga i te awa o Waikato.