Kaupapa: Treaty Settlements

Ka whai mana ā-ture a Ngāti Toa Rangatira ki te ngeri 'Ka mate'

  • Te Whanganui-ā-Tara

Nō te rangi tonu nei, whakaae mai ai ngā mema o te whare pāremata ki tētahi pire e whakawhiwhia ai te whitu tekau miriona tāra ki tētahi iwi o Te Upoko o Te Ika. I te rā nei, tautokohia ake ai te whare miere i te pire whakatau i ngā nawe tiriti a Ngāti Toa Rangatira. Āpiti atu ki tērā, i whakamanatia anōtia ko te ngeri 'Ka Mate' hei tāonga motuhake kia rātou anahe anō.

Ahakoa pēhea, kua whakamahia te ngeri a Te Rauparaha "Ka mate" puta noa i te ao e ētahi kamupene, pērā i te kamupene hangawaka Itāriana, a Fiat, he rua miriona tāra te wāriu.

Engari inaianei, ka tāea e Ngāti Toa Rangatira te whai pūtea i te ngeri kua whai rongonui horapa nui i te ao.

E ai ki te pire, ki te whakamahia te ngeri mō te arumoni te take matua, me tuku mihi atu ki te kaitito o taua ngeri, ki te rangatira o Ngāti Toa Rangatira, a Te Rauparaha.

Ā, rere ai ngā mihi kia Ngāti Toa Rangitira i roto i te whare miere i te rangi nei.

Hēoi kua ea ngā wawata o te iwi o Ngāti Toa Rangatira, kua whai mana tō rātou tāonga, tō rātou tipuna rongonui, me āna kupu tohutohu kia tātou anō hoki.