Kaupapa: Technology

Ka whai hua te Māori ki te ao hangarau

Wepiha Te Kanawa
  • Tāmaki Makaurau

Ko te ao hangarau tērā e panoni ana i te ao pakihi, ā, ināianei ko ia anō tērā kei te whakapoapoa i ngā kaiwaihanga Māori.

Ko ngā mahi a Ian Taylor (America's Cup 2013) rāua ko Rhonda Kite (Kiwa Digital) ngā hangarau hōu o te ao, ā, nā te Māori i hanga.  Ināianei ko te whainga a DigMyIdea he rapu i ētahi Māori koi.

E ai ki te kaikōrero o Auckland Tourism, Event and Economic Development a Charmaine Ngarimu, ko te whainga o 'DigMyIdea' ki te rapu i ngā whakaaro o te hunga rangatahi, otirā o te iwi, ki te awhina hoki i a rātou kia tutuki a rātou wawata.

Mēnā rānei he whakaaro tāu mō tētahi pūmanawa hangarau, tēnā e hiahia ana a Charmaine Ngārimu ki te kite.  E rua ngā wāhanga, ko te tekau mā rima tau ki te tekau mā waru tau te pakeke, ko te tekau mā iwa tau neke atu hoki.

E ai ki a Ngarimu i puta te whakaaro whai muri i te kitenga atu i te Māori e angitū ana i roto i te ao hangarau.

I mea mai a ia ki a Te Kāea, ko te hunga pēnei i a Ian Taylor me ana mahi ki te kapu o Amerika rāua ko Rhonda Kite, ko rāua ngā whakaihuwaka o te ao hangarau.

E ono rā e toe ana ki te tuku i tō tono, kātahi ka āta tirohia e ngā kaiwhakawā, tirohia te paetukutuku mō ētahi atu pārongo.