Ka whai hua reo Māori e ngā kura auraki o Te Raki Paewhenua

Tema Hemi
  • Tāmaki Makaurau

Atu i te rua mano ngā tauira me ngā kaimahi nō ngā kura o Te Raki Paewhenua i whakatōpū i te rā nei me tētahi karere nui. Ko tā rātou kia tautoko kia noa hoki  Te Reo Māori. 

He huihuinga whakaehu me kotahi te reo.

Ko tā tākuta Valance Smith kōrero, "ki au nei ko te tino kaupapa kia puta ai te reo ki waho i te karaehe, kia noho noa te reo ki runga anō i ngā huarahi, kei roto i ngā whare kawhe atu i ngā karaehe i roto i ngā kura tuarua, i roto i ngā kura tuatahi koina te mea nui."

E anga whakamua ana ngā kura auraki o tēnei wāhanga o Tāmaki ki te whakatenatena i Te Reo.

Ko tā Smith anō, "i roto i ngā kura tuatahi i roto i ngā kura tuarua tokomaha ake ngā tauiwi me ngā akonga tauiwi e ako ana i te reo nōreira e tika ana kia hikoia te kōrero i roto i tēnei āhuatanga arā ko te reo huarahi."

Ko tā ngā kaiwhakahaere nā te whakaehu me te tokomaha i tae tautoko i tutuki i a rātou i matapaetia nei.

He ai ki ngā tatauranga o Aotearoa 2013
e tata ki te kotahi rau rima tekau mano tāngata ka kōrero i Te Reo Māori
mai i tērā nama e kotahi rau rua tekau mā rima mano he uri Māori
ka mahue ko te rua tekau mā toru mano o ngā tauiwi e marama ana ki te reo. 

Ko tā te hapori o Te Raki Paewhenua ko te āpōpō o Te Reo kei roto i ngā ringaringa o te hunga rangatahi.

I whakakōpani a Smith me tēnei kōrero, "Ae ko tēnā te wawata arā ka tipu ake te hunga rangatahi i roto i te reo ā tōna wa ka noho pakeke me te reo."

Ko ngā huihuinga ka whakanuia i te wiki o te reo ka tu ki te pokapu o Tāmaki Makaurau ā te Rāpare, katahi ki Manukau, Turanga me Rotorua hei te Rāmere.