Kaupapa: Health

Ka whai hua ngā marae i Rotorua, ko ngā wānanga P te take

Mere McLean
  • Waikato/Te Waiariki

Kei te whakaako a Kevin Hollingsworth i te iwi e noho ana ki Rotorua ki ngā kino o te taimiri P, he tangata kai i tēnei tarukino ō mua mo ngā tau e whitu kua noho P kore.

He kaimahi nō Te Utuhina Manaakitanga e awhi nei ki te whakahaere wānanga ki runga marae mo te taimiri nei, ā, kia noho hei tauira whai ma ētahi atu.

Hei tāna, “He mataku nōku kei te piki tēnei taimiri ki roto i te hapori engari puta noa i ngā hapori katoa koinei tētahi ara te mahi tahi me ngā pirihimana, Ngāti Pikiao me mātou kia whakarongo hoki ki ngā whakaaro o te hapori me pēhea nō reira he timatanga ēnei wānanga.”

Tekau mā rua tau a Kevin e kaingakau nei ki te taimiri P, ināianei he kaimahi ia ki raro o Te Utuhina Manaakitanga e hapai nei i te hunga kua pākino ki te waipiro, tarukino hoki.

Ki tā Te Pae Akurangi-Fitzell o Te Rūnanga o Ngāti Pikiao, “ka whai mana na runga i te taenga mai o Kevin, ka miharo rawa te iwi ki ōna kōrero na te mea kei te mātau ki te kaupapa, ehara i te mea i pānui, i ako rānei, ā, he tauira ia.” 

Engari ki tā Hollingsworth, kua roa te take P e tipu ana, “E ai ki ngā tāngata kei raro i tōna awhina, he rangatahi e kī ana he māmā ake te P ki tērā o te taru kino, oho rere ana tērā ki ahau.” 

Ki waenganui i a Kevin me Te Pae kua puta mai te kaupapa Tū Tauā, kua oti nei rāua te whakahaere i ngā wānanga e toru ki runga marae, ā, neke atu i te kotahi rau te hunga kua tae atu.

“Kei te hiahia rātou ki te mōhio he aha ngā tohu mo te taimiri, ā, mo ētahi kāre rātou i te paku mōhio ki tēnei kaupapa no reira ko te whakaako te mahi nui kia mātau rātou ki ngā tohu,” ki tā Te Akurangi-Fitzell.

Kei te hiahia rāua kia hari atu ēnei wānanga ki runga i ngā marae katoa o Rotorua i mua i te whāngai atu o tēnei kaupapa ki ētahi atu marae puta noa i te rohe o Te Moana a Toi.