Kaupapa: Fashion

Ka whai hua ngā kaiwhakahoahoa Māori hei te wiki whakarei i ngā pueru o Aotearoa

Wepiha Te Kanawa
  • Tāmaki Makaurau

Hei te Rāhina tīmata ai te wiki whakarei i ngā pueru o Aotearoa, ā, ko tā te ringa hoahoa kākahu Māori, ko tā Sharmaine Moke, he whakatikatika i āna kākahu ka whakaaturia ki te whakaaturanga o Miromoda.

Koinei te wā tuatahi ka whakaaturia ngā kākahu a te uri o Ngāi Tahu me Te Arawa kua hangaia i raro i te tapanga o GRAY, ki te taiopenga hoahoa kākahu matua nei o Aotearoa, otirā e tūmanako ana ia ka titia ko āna kākahu ki a hirikapo.

Nō te ekenga o Sharmaine Moke ki te rua tekau tau te pakeke, he tuitui kākahu tāna mahi. Ināianei, kua puāwai ōna wawata i te tohutanga o āna pueru tohu GRAY ki te ara pueru.

Ko ia tētahi o ngā kaihoahoa pueru Māori tekau mā ono i roto i te whakaaturanga o Miromoda ka whakaatu i a rātou kākahu ki te ahurei pueru o Aotearoa a tērā wiki.

E ai ki a Sharmaine he wairua pātāone, wairua whakaahuru hoki āna pueru.

Hei tērā wiki kite ai i ngā pueru a Sharmaine ki te whakakitenga e kīa ana ko "Concrete Jungle" i te ahurei pueru o Aotearoa.