Kaupapa: Crime

Ka tū tētahi kaiako ō-mua ki mua i te kōti mō ngā whakapae kino

Mere McLean
  • Waikato/Te Waiariki

Kare ano kia tau noa ngā puehu i te kapua whakapae e iri ana ki runga i Te Wharekura o Maniapoto, inā rā, kua ūhia ki runga ki a Reuben Tapara, he kaimahi ō-mua o te kura, ētahi whakapae raweke taiohi, mō te wā i te mahi kē ia ki tētahi atu kura Māori ki Putāruru.

Ko tā Hone Te Rire, te heamana hōu o te poari o Te Wharekura o Maniapoto, e rongo ana rātou i te taumaha.

“Ki ngā tamariki, mokopuna ki ngā kaimahi hoki kei raro rātou i te kapua pouri e noho ana i tēnei wa, heoi ano, kei konei matou o te poari hei hiki wairua, kia piki ngā wairua o ngā tamariki, mokopuna otira ko ngā kaiako.”

I mahi a Reuben Tapara ki te kura mai i te tau rua mano mā toru ki te tau rua mano mā waru, i a ia i konei i rere tētahi whakapae i kino te ahua o tana piri ki tētahi o ngā tauira. 

Ka whakaritea e te poari o tera wa he arotakenga, ka whakapā hoki ki te ropu New Zealand School Trustees Association mō ētahi āwhina a ture.

I te mutunga iho, kīhai i mana ngā whakapae nā te korenga o ngā whakamaramatanga me ngā taunakitanga.

Heoi, ko te pakirehua mena i hunaia ēnei kōrero i te wa i tono turanga mahi ā Reuben Tapara ki tetahi atu kura Māori.

Hei āpōpō ka tū anō a Reuben James Parinui Tapara ki roto i te kōti ā-rohe o Kirikiriroa, ā, kāre anō ia kia whakaae, kia whakahē rānei i ngā whakapae kua utaina ki runga i a ia.