Ka tū te kura motuhake o Kamupene A hei kura hourua

Dean Nathan
  • Te Tai Tokerau

I raro i te pūtea tautoko a ASB Trust, kua toru tau iaiānei te kura motuhake "The Leadership Academy of A Company" e hāere ana.

Inaianei kua tohua e te Kāwanatanga hei kura marika otira hei kura hourua.

Te Kaihautu o ngā marautanga mō te Kura Hourua ki Whangaruru, kei te tōrunga tonu te tirohanga a Natasha Sadlier ahakoa te hunga whakahē pērā i te rōpū PPTA me tana whakatupato kei whakakorekorengia e rātou ngā kura hourua.

Kahore hoki he mutunga ki ngā tatauranga kino nei.  I te tau rua mano ma whitu he waru tekau ma tahi paiheneti o ngā tama Māori katoa ki ngā kura tuarua o Whangarei i hinga i te taumata tuatahi o NCEA.

Koia pū tētahi o ngā tino take i kōkiritia kia whakatūria ai tēnei kura motuhake.

E kawe ana i te ingoa o Kamupene A, he kura motuhake tēnei i whakatūria ai hei whakahōnore i te rua tekau ma waru kia whai hoki i tētahi ara kē atu hei poipoi i ngā rangatira Māori o āpōpō.

He poto hoki te wā ka tīmata ēnei kura hōu.  E whakaae ana ngā kaihautū ehara i te mea ko te kura hourua te rongoā ki ngā raru katoa engari he waka anō tēnei e taea ai ētahi whakautu mō te wāhanga mātauranga.

Ki ngā matapae, he maha atu ngā kura auraki, kura Māori, kura motuhake hoki ka whai i te ara kura hourua a muri nei.