Ka tū te kohinga kākāhu o Te Kohu ki Fashion Week

Aroha Treacher
  • Te Tai Rāwhiti

Kua whakawhiwhia ki a Misty Ratima, te kaituitui kākāhu nō Kahungunu, i te tohu ikeike o Miromoda 2018 mō te wā tuarua, nā ōna kohinga kākāhu avant garde i tāea ai e ia te whakaatu atu ki New Zealand Fashion Week.

Koinei ngā kākāhu hōu o Te Kohu, he kohinga miharo rawa e kīa nei ko Decolonise.

"Koinei kohinga kākāhu me ēnei anipani e whakaahua ana i ōku whakaaro e pā ana ki te wahine me te whare tangata, kua tukuna tēnei mō te section Avant Garde ki roto i a Miromoda nā reira he pai tēnei mōku kia kōrero mō te wahine," tā Ratima.

Nā ngā kākāhū pēnei i whiwhi ki aia te tohu whakaihuwaka o ngā kaiwhakaatu kākāhu tekau mā whā i whai waahi atu ki Miromoda i Porirua.


"Ae kua toa engari i runga i te ngakau whakaiti itemea he maha ngā kaiwhatu kākāhu i tae atu me te papai rawa o ngā kohinga kākāhu katoa."

Nāna he kohinga kākāhu tuarua, he taera o te ao auraki heoi e kōrero ana mō tōna māoritanga me te tiaki taiao.

Kei te kōrero au mō te taiao me a tātou mahi ki runga i te whenua nā reira e hāngai pū ana ki tēnei ao whatu kākāhu nātemea kei te kino ngā mahi ki tawaahi e ai ki ngā tāngata.

Koinei te wā tuarua ka whakaatu kākāhu ki Fashion Week, he wheakotanga nui mōna ki te mārama i ngā nekenekehanga o taua ao.

"Ko tōku wawata i te mutunga atu kia whai waahi ki ngā whenua rerekē tērā pea kia tae atu ki ngā iwi taketake o Kānata ki Amerika kia ako tonu au i ngā momo ahuatanga mo tenei mea."

Ka tū taua wiki whakaatu kākāhu hei te rua tekau mā whitu o Akuhata ki Tāmaki Makaurau.