Kaupapa: ANZAC

Ka tū ngā whakamaharatanga ANZAC ki te marae o Te Rewarewa i Ruatoki

Rahia Timutimu
  • Waikato/Te Waiariki

E hia nei tau ki muri, he pakanga te mahi. I tēnei rā, he marau, he manatū, he maumahara.

Nui ake i te tahi rau ngā hoia ō-mua, ngā mema o ngā momo ope tauā, me ngā mema o ngā whānau o rātou kua huri ki tua o Paerau, i whakakotahi kia hikoi tahi ki te marae o Te Rewarewa.

I pōhiritia rātou e te toru nei tāngata o te hapori.

Hei tā John McCorkindale, “Ā, maha tonu rā, titiro, ka rawe hoki, he kikī ana te marae atea nei i ngā hoia, ngā heremana, me ngā whānau tautoko i a rātou, e pēnei tonu a Te Rewarewa”

Ko te mea kaumātua rawa o ngā mōrehu i tae i tēnei rangi nei ko James Fowell, he iwa tekau mā toru tau te pakeke, ā, nōna tētahi o ngā kanohi ika-ā-Whiro i pakanga ki Casino, i te tau kotahi mano iwa rau whā tekau mā tahi. I ngā tau ki muri, he rite tonu tana taetae atu ki ngā rā whakamahara ka tū ki Whakatāne, hēoi anō i rangatira ai a Te Rewarewa marae i a rātou ko tana whānau, me ērā i tae atu i tēnei tau.

Hēoi anō rā, e ai ki a James Fowell, “Ka hoki ngā mahara ki aua wa me ngā hoa o taua wa, me rātou kāre i hoki mai ki te kainga, i tino waimarie mātou te hunga i hoki mai”

I tonoa tēnā whānau, me tēnā whānau ki te whakatakoto i ētahi rau kawakawa hei tohu whakamahara ki ō rātou tūpuna, kua poto atu ki te pō. Kua rua tekau tau, hemihemi, te roa o Emaraina Milroy e whatu ana i ēnei momo tohu whakamahara mō Te Hokowhitu-ā-Tū, ā, e kitea whānuitia ana āna whatunga ia te rā whakamahara, ia te rā whakamahara.

Hei taana, “I te tino hikaka au i te kitenga ake o ngā putiputi hōu, i te mea, i rongo te iwi kua mutu aku mahi whatu, nā reira, i kaha te iwi ki te whatu i ā rātou ake huinga putiputi”

Ā, kua tukuna ihotia e ia ōna mātauranga ki tana tamāhine, ki a Tina, tēnei e waha nei i ōna tūmanako ki te pae tawhiti.

Mō tērā tau, taetae mai ai ōna tini, ōna mano, nā rā e whakanui nei te tau hou i te kotahi rau tau o ēnei whakamaharatanga whakahirahira.