Ngā kaupapa: Kapa Haka, Te Reo Māori

Ka tū ngā Kōhanga Reo ki te papatūwaewae o Te Mokotini

Mānia Clarke
  • Te Tai Tokerau
  • Tāmaki Makaurau

Tekau ngā kohanga reo mai i Tāmaki Makaurau me Te Taitokerau ki te papa whakat`ū waewae mo Te Mokotini i te rāwhiti o Tāmaki.

E ai ki te kaumātua o TKR o Te Puau Te Moananui a Kiwa a Tumanako Waiwai ma ngā pakeke anake te whakataetae o Te Matatini engari ko te whakanui i te ahurea māori te kaupapa o Te Mokotini.

Hei tā Waiwai ko te whakawhanaungatanga tōna aronga nui.

“Kia rongohia ai te reo o a tātou tamariki me wā tātou mokopuna. Ki te whakaatu ō rātou akoranga i roto i ngā rūma akoako i ngā kōhanga reo,” i mea atu ia.

“Tēnei rā ka haere mai rātou e tū ai rātou ki runga i te atamira kia kite ai tō rātou ātaahuatanga.”

E ono tau ki muri i ahu mai te kaupapa o Te Mokotini mai i Te Tai Tokerau.

“Ka rongo ki te kupu nei Te Matatini e pā ana ki ngā tangata kaumātua kē, ka whakaaro ake mātou, koia mātou me huri ki te moko, te tini o ngā tamariki i waenganui a mātou,” te korero a te kaiwhakahaere o ngā Kōhanga Reo o Te Tai Tokerau ki Te Raki Paewhenua, a Bina Hepi.

Ināianei e kawea ana e ngā purapura maha i ngā rohe, whērā i Te Purapura o Te Manu Tōmiro.

“I te wā e kuhu mai a mātou tamariki ngā pīpī pāopāo rātou ngā pēpi rātou kia tīmata ai te ako i ō mātou kaupapa e pā ana ki Te Kōhanga Reo, ā, te whakawhanaungatanga, te reo me ōna tikanga,” i mea atu a Rāhera Shepherd, pouako i TKR o Hineteiwaiwa.

“Ko ērā mea e whakaritea ana e rātou te tupu ai i roto i tō tātou ao Māori,” i kī atu ia.

“Ko te whakanui ake i ngā mokopuna, ko tērā te kaupapa o Te Kōhanga Reo, ko ngā mokopuna kē,” te kupu a Hepi.

“Mā rātou kē mātou e whakahuihiu.”

E ngana ana ngā kaiwhakahaere kia rahi ake te huinga me te tūhono o Ngā Kōhanga Reo atu o Tāmaki Makaurau ia tau ia tau.