Ngā kaupapa: BUDGET, Elections

Ka tū māro te Pirimia me tōna Kāwanatanga ki tō rātou Tahua Pūtea

  • Tāmaki Makaurau

E pako ana ngā pū a ngā rōpū āpitihana ki te tahua pūtea a te kāwanatanga, engari e tū māro tonu ana te Pirimia me te Minita Take Māori ki tā rātou i whakatau ai. Kāti, i Tāmaki Makaurau tā matou karere take tōrangapū a Maiki Sherman i te rangi nei ki te whakatakoto i ngā wero a te āpitihana ki a rāua. 

E pania ana te pata ki te parāoa i te parakuihi tahua a te Pirimia, engari ko te wero nui a ngā rōpū āpitihana, he kongakonga noa i hora ki te tēpū tahua mā te hunga rawakore.

E ai ki te Minita Take Māori, ki a Pita Sharples ko ngā whānau e rongo ana i te taumaha pērā i ērā i te Tonga o Tāmaki nei ka whai hua i te kaupapa kore utu mō ngā haerenga rata, whiwhi rongoā hoki, mā ngā tamariki katoa i raro iho i te tekau mā toru tau te pakeke.

Kāti, i te tahua pūtea e tūwhene ana, e whakapono ana te Pirimia ka aronui te tokomaha o Ngāi Aotearoa kei Ahitereiria e noho ana ki te hoki mai ki te wā kainga.

Kāti, i te Pāti Māori e whakanui ana i āna whiwhinga pūtea hōu kotahi rau rima tekau mā rima miriona te nui - e mihi ana hoki ki te tahua whakamutunga a āna Minita, a Tariana Turia me Pita Sharples.

Kāti hei te kōwhiringa pōti riro ai i ngā kaipōti te kōrero whakamutunga, arā, mēnā i reka, i kawa rānei ngā kai o te tahua ki a rātou.