Kaupapa: Kōhanga Reo

Ka takatū ngātahi atu a Mātaatua Tauranga Moana ki runga i a Tūrangawaewae

Wepiha Te Kanawa
  • Waikato/Te Waiariki

Mā te kupu whakamoemiti tonu rā i para i te huarahi kei mua i a Mātaatua Tauranga Moana i te rā nei.

E ai ki a Reremoana Pitau, ko ia hoki te heamana o Te Kotahitanga o Mātaatua e mea nei “Kei te tau ngā mahara o tēnei o ngā rohe o Mātaatua Tauranga Moana, kei te mārama ki ngā kaupapa hei whakatakoto mā mātou, kia tae atu mātou ki roto o Tūrangawaewae.”

Nā Mātaatua Tauranga Moana tonu i hika ake ai ngā pātai e pā ana ki ngā whakahaerenga ō runga. Nō te panatanga o te Tumu whakarae ō mua, o Titoki Black i ngā marama tekau ki muri, kua īnoi atu kia hui ki te taha o te Poari, inaianei kua tutuki taua hiahia, ā, e mau tūturu tonu ana a Mātaatua Tauranga Moana ki tā ratou e whakaponotia ai.

Hei tā Te Waiarani Harawira e kōrero nei, “Kia whai wā, kia whai reo ngā whānau, kei roto i te korowai e kii ana te mana whakahaere kei ngā whaanau, te mana kei ngā whānau, engari i roto i ngā mahi inaianei karekau i te whai wāhi ngā whanau.”

Ehara i te mea kua whakaae te katoa o Mātaatua Tauranga ki tā rātou tū, engari i roto i ngā marama me ngā wiki tata nei kua whakakotahi ngā whakaaro o tēnā, o tēnā.

Ko tā Veronika Edwards, o Tauranga Moana e mea nei, “I hui atu mātou i tērā atu wiki, i reira mātou e whakawhitiwhiti kōrero, whakawhitiwhiti whakaaro ana, i puta mai te riri, te mamae, ērā momo. Inaianei kua tau, kua whakatau i a mātou, Tauranga Moana Mātaatua he aha ā mātou.”

Hei tā te Heamana o Te Kotahitanga o Mātaatua Tauranga Moana kotahi noa tā ratou e whai nei, arā ko te Kōhanga Reo me ōna tikanga tūturu i waihanga tuatahitia ai ia.

Kua roa nei a Mātaatua Tauranga Moana e hoe ana i tā rātou ake waka, ā, ahakoa te karekare o ngā wai i ngā marama kua hipa, e manako ana rātou ka marino te haere whakamua.