Ngā kaupapa: Employment, Māori Language Week, Te Reo Māori

Ka rahi ake a McDs i te reo Māori

updated Mānia Clarke
  • Waikato/Te Waiariki

He tekau mā iwa tau te pakeke o tētahi kai-mahi ki Makitānara i Kirikiriroa e whētuki ana i ngā tohutohu a tōna kai-whakahaere ki a ia kia kaua e kōrero Māori i roto i taua whare kai.

Kei te nui hoki tana pāpōuri i te mea, ko tana hiahia tonu he tautoko i te wiki o te reo Māori.

Kua ono marama a Janine Eru-Taueki e mahi ana i te wharekai o Makitānara, ā, nō tērā Rāpare i whakamōhio atu ai ki a ia i tētehi kaiwhakahaere ā-pō, i ahu mai te tohutohu i ngā amuamu a ngā kaihoko me ngā kaimahi kua whiwhi rātou. 

“I pupū ake te riri i roto i au, te mamae, koira te wā tuatahi, kua kōrero, kua kī mai tētahi kaua e kōrero Māori,” i mea atu a Eru-Taueki.

“Tēnei te wiki o te reo Māori, engari ki tā mātou kura ko tēnā, he Māori noa tēnā. Ka kōrero Māori i te ao i te pō.”

I kī atu tana kaiwhakahaere he harehare te kōrero reo ake ki ngā kaihoko e kūware ana ki tāu e kōrero nei.

I kōrero mai tētehi māngai o Makitānara, ko tāna me kōrero Ingarihi kei pōhēhē te kaihoko he kōrero huna āu mōna.

“Kāore au i te whakaae i te mea he reo motuhake te reo Māori, ko tētahi o ngā reo matua o Aotearoa,” i mea atu a Eru-Taueki.

“Ko ētahi o ngā kaihoko ka haramai me te kī "Au, tēnei koe ka taea te mahi taku kai ki roto i te reo Māori? Ka pouri au i tērā atu pō nā te mea i whāki atu au, tē taea e au ināianei.

Ko te whakahau a Makitānara i Aotearoa, te āhua nei he pōhēhētanga nui te take, kīhai rātou i whiwhi amuamu e pā ana ki a Janine.

Wheoi, kua ara ake te take mō ā rātou kaupapa here me ngā kaimahi ki te kōrero Māori.

Ka kōrero ngā kaiwhakahaere ki a Janine, me te anga whakamua kia hanga kaupapa here hei whakatairanga i te wiki o Te Reo Māori.