Ka Porotēhi ngā kaitautoko o Hato Petera

Tema Hemi
  • Tāmaki Makaurau

E whawhai tonu ngā whānau me te komiti a ngā tauira tawhito o Hato Petera kia tuwhera tonu ngā tatau o te kura. I whakatu he porotēhi ki te whare Auckland Catholic Diocese i te rā nei. 

Ko te tino hiahia a ngā whānau o Hato Petera, ko tā rātou reo kia rāngona.

Ko tā te kōrero o tēnei tauira tawhito o te kura a Mate Webb, "Kua tae ki te wa kua tino riri rātou, ko te take, kāore i te whakarongo ki ēnei kua tae mai i tēnei ra."

I tēnei marama tonu i whakatau ai e te minita mātauranga Chris Hipkins kia aukati i te tāuketanga o te kura.

Ko tā Webb anō, "Ehara ko te pīhopatanga anake, ehara na Te Tāhuhu Mātauranga anake, engari ko te maha o mātou, i roto i ēnei whiringa kōrero kaore i taea te mahi ngātahi nei."

Ko tā te kōrero o te iwi o Ngāti Paoa he mana rangatira to rātou ki tēnei whenua ki Te Raki Paewhenua, arā ko te wāhi e tu ai te kura.

Ko tā tēnei uri o Ngāti Paoa a Reti Netana Hohaia Boynton, "Kei konei mātou i tēnei ra i te mea na mātou o Ngāti Paoa te whenua i tākoha ko te mātauranga mo ngāi Māori te take. Mōku ake kīhai rātou i ū ki te whakaaetanga nōreira ko ta mātou me whakahokia mai i te whenua."

I whakatū ai te kura i te tau tahi mano iwa rau rua tekau mā waru, kua pōkaikaha nei i raro i Te Tāhuhu o te Mātauranga. Ko tā Boynton mēna ka aukati te kura, me whakahokia te whenua ki a Ngati Paoa.

Ko tā Boynton anō, "Kaore rātou i te ū ki te whakaaetanga kei te whati kē rātou i te ture, he mahi whanako ta rātou mahi ā he mea hē ki tā ngā ture wairua o te Paipera."

I whakakōpani a Webb me tēnei kōrero, "Te taha ki tētahi tono a ngā tauira tawhito ki te taha o te taraipunara, ae he take anō tērā. Kua tae mai anō a Ngāti Paoa, ko te whakāro pea he tino uaua mā te kawanatanga."

Ka puta te whakatau a Minita Hipkins mo te kura hei te rua wiki e tū mai nei.