Ngā kaupapa: Kapa Haka, Te Arawa

Ka ora tonu ngā mahi kapa haka i a ngā rangatahi o Te Arawa waka

Mere McLean
  • Waikato/Te Waiariki

Rua tekau mā tahi ngā rōpū kei te tū ki roto i te whakataetae kapa haka ā rohe o Te Arawa i enei rā okioki. Kei te whakataetae atu ngā rōpū mo tētahi o ngā tūranga ki Te Matatini. Heoi, e whakaaro ana ngā kaiwhakarite ko te tini me te mano ka tae mai i ēnei rā okioki.

E mātau ngā kaiwhakahaere o tēnei huinga ka pai ngā mahi, na runga i a Piki Thomas. Hei tā Trevor Maxwell o Te Arawa, “I te wā ka tae mai ngā rōpū koia tērā kei reira tae noa ki te mutunga, me mihi rā ki taku whanaunga a Piki mo ānga mahi”.

Neke atu i te tekau tau a Piki e noho ana hei kaiwhakahaere mo te papa tū waewae ki konei. Koia hoki te kaiwhakahaere mo te papa ki Te Matatini.

“I tae mai te tono i taku hoa, tino hoa a Wiremu Te Aho me tana kī kei te hiahia koe ki te noho tata koe ki te ātamira ki te mātakitaki i ngā rōpū, ā, taku pōhēhē i tērā wā tonu ka tuku mai i tētahi tūrū māku kia mātakitaki, engari ko te kaupapa o tana tono mai ki ahau kia whakahaere i te ātamira.”

I tono atu a Piki ki ngā tauira o Te Kura o Te Koutu kia hapai i ngā mahi manaaki i ngā rōpū rua tekau mā tahi ka tū ki te huinga.

E ngana hoki ana ngā tauira ki te mahi ki raro i a ia. Hei tā Paetahi Mitchell, tauira nō Te Kura o Te Koutu “he mīharo ōna mahi, ōna whakaritenga hoki, ā, mo tātau katoa e te whānau e awhina hoki ēnei rōpū e tū ake nei”. He pērā hoki ngā whakaaro mai a Ihipera Haverkamep o te Kura o Te Koutu hoki “Ahakoa tana kaha aro ki te kaupapa he harikoa tonu”.

Āpōpō ko te rōpū tuatahi ki runga i te papa tū waewae ko ngā pakeke o Ngāti Pikiao, ka tū hei te iwa.